Da ka jingïatrei lang ka sorkar bad NESAC la lah ban ïada na ka jingshlei um : Conrad

Shillong, Iaiong 17: U Myntri Rangbah ka jylla u Conrad K Sangma ula ong, ba ka Space Technology ka la leh ïa ka bynta kaba khraw ha kaba ïadei bad ka jingshim rai jong ka Sorkar Jylla halor ki kam jong ka imlang sahlang bad ka ïoh ka kot.
Haba kren haka jingplie pyrda ïaka 4th Edition jongka Space Economy Leaders Meeting (SELM) hapoh ka GS Presidency of India kaba la long ha Courtyard Marriot Hotel hynne ka Lah Sngi u Blei, u Conrad Sangma ula ong ba ka sorkar jylla ha ryngkat ka jingïatreilang bad ka NESAC ki la lah ban pyndonkam ïa ka space technology ban ithuh bad ban pynkhreh ïa ki polisi ban ïada bad tehlakam ïa ka jingshlei um ha ka lynti kaba biang bha hapoh ka jylla ha u snem ba la dep.
Ula ong, ka space technology kala ïarap ha kaban tehlakam ïa ka jingshlei um da kaba ïaid katkum ka juk stad saian.
U Myntri Rangbah ula ong ba ka space technology ka la ïarap ïa ka sorkar jylla ban ithuh ïa baroh ki jaka kiba don ia ki khlaw kiba rben bad kumno ban shim ïa ki sienjam ha kaba ïadei bad ka jingkylla ka suinbneng bad lyngba ka space technology ka la long shisha ka jingmyntoi ha kaban ïada ïa ki Catchment Areas bad ïa ki jingthaw kiba har rukom.
Ula ong, ba ka sorkar kala pyrshang katba lah ban pyndonkam ïa ki kor ki bor ban pynthikna ba kan lah ban ai ka jingshakri kaba bha tam ïa ki paidbah.
Nalor kane ula ong, ba ïa ka jingïalang jong ka G20 SELM la pynlong ha kajuh ka por haba ka ri India ka la kiew irat ha ka jingïaid shakhmat ha ka liang jong ka space technology bad ka dei ruh ha ka por ba ki ri hapoh ka G20 ki la bhah tyngka bha ha ki prokram kiba ïadei bad ka haw-haw.
Ula ong ba u ngeit skhem ba ka kyrteng jong ka nongbah Shillong kan ïai paw ha ki pateng ban dang wan, haba ïa kitei ki mawnongrim bad ki polisi ki la sdang treikam na Shillong.
U Myntri Rangbah ula ong, katba ka ri ka dang ïaid shakhmat, hynrei ka thaiñ shaatei lam mihngi kum ka jylla Meghalaya ka bym pat ju sakhi ïa ka jingkiew irat jong ka ïoh ka kot ka la lah ban ïadon bynta ha ka jingkyntiew pat ïa ka ïoh ka kot bad ka jingjop jong ka ri bad mynta ka thaiñ shatei lam mihngi ruh ka la kiew shaphrang.