Da ka jingïaseng kyrpang ban pynmih pisa shna Iingmane pynlong ka Balang Presbyterian Erpakon

Nongpoh, Nohprah, 15: Ka Jingïaseng Samla jong ka Balang Presbyterian Erpakon, lyngba ka Committee kyrpang mynta ka sngi kala pynlong da ka jingïaseng kyrpang ban pynmih pisa na ka bynta ban ïarap ïa ka Balang ban tei bad shna pyndep ïa ka iingmane ba thymmai kaba dang don hapdeng ka lynti ban pyndep noh ïa ka.
Ïa katei ka jingïaseng kyrpang kaba la long ha ka por 1:30 noh phai sngi ha iing mane jong ka Balang Presbyterian Erpakon la wan ban sam ïa ka ktien ka jong u Blei da u Bah Pynshngaiñlang N Syiem Rangbah Balang ka Balang Presbyterian Jaiaw Lumshyiap, u ba dei ruh u Dy. CEM ba dang shu hiar shuki ha KHADC, ba la sakhi ruh da ka jingdonlang, ka kong Macdalyne S Mawlong MDC ka Umsning Constituency, u Bah Rocky A Marweiñ uwei na ki samla Rangbah na ka thaiñ Umsning, ki Rangbah Balang, ki tymmen basan lem bad ki spah ngut ki parabangeit jong ka Balang Presbyterian Erpakon bad na kiwei ki Balang.
Haba sam ïa ka ktien u Blei ha katei ka jingïaseng ba ar, u Bah PN Syiem u la sot lyngba ka kotbah na u Isaiah ka lynnong kaba 45 bad ka dkhot kaba 2 kaba ong “Ngan leit ha shuwa jong me bad ki jaka khohruh khohram ngan pynmadan” ba u Blei um shym la iehnoh hynrei u don bad ki para bangeit jong ka Balang Erpakon kiba don ka jingthmu bad ka jingangnud ban pyndep noh ïa ka iing mane na ka bynta ban ïoh shakri bad pyndon burom ïa u Blei.
U la pynpaw ruh ka jingsngewkmen kaba khraw ba kum ka Balang Prebyterian Erpakon ka kynmaw ïa u bad ban ai bynta ha ka jingsam ïa ka ktien ka jong u Blei watla bunsien u ju pynlut por ha ka kam saiñ pyrthei bad kane hi ka pynpaw ba nalor ka jingim ba kynja doh man ka sngi, hynrei ngi donkam ïa u Blei u ba ju ri ju sumar bad pyndap pynbiang man ka sngi.
U la ai ruh ka jingïaroh ïa ka Balang Presbyterian Erpakon kaba la nangroi nangsan katba nangmih ki sngi bad kane kan dang pynrhem ïa ka mynsiem shakri jong ki parabangeit, namar u Blei u don ha syndah ka jingim jong ngi ba man ka sngi.