Da ka jingïarap jong ka BJP, ka NPP ka la tih thliew kaba ma ïa ka lawei ka jaitbynriew: Vincent H. Pala

Mawkyrwat, Lber 25: Ka South West Khasi District Congress Committee (SWKHDCC) mynta ka sngi ka la pynlong ka jingïalang ïa ki nongkyrshan jong ka Indian National Congress (INC) hapoh ka Community Hall Mawkyrwat ha kaba u kyrtong sha ka Lok Sabha na ka Shillong Parliamentary Seat, u Ma Vencent H. Pala u la donlang.
U Ma Vencent H. Pala haba kren ha ka jingïalang u la ong ba ki paidbah ki la tip kaei ka NPP ne ka National Peoples Party namar mynta lei lei kane ka party ka la tih lypa ïa ka thliew ban pynap ïa ka jaidbynriew da ka jingïarap jong ka BJP ne ka Bharatiya Janata Party bad ka long kaba ma bha bad ka pynap ruh ba ïano yn tep ha kata ka thliew. ‘Baroh ki tip ïa ka jinglong jong ka NPP bad ka BPJ ki long kumno, hynrei ki nongïalam jong ngi pat tang ban myntoi shimet ki ïa mareh shimiet shimiet ban leit snoh sha ka”, ong u Ma Pala kumba ka la jia.
U la ong ruh ba mynta ka Bharatiya Janata Party (BJP) ka leit ban kyrshan ïa ka National Peoples Party (NPP) hynrei ki nongthep vote pat ki wan sha ka Indian National Congress (INC) ban pynïasnoh. Namarkata, ka kam MP ka dei kawei na ki kam bad kit ïa ka khia ka shong jong ka ri bad ka jaidbynriew bad wat ong ruh ka Congress kam jop mynta hynrei bun ki paidbah na kylleng ki jaka ki la sngewthuh ba kane ka party mynta ka dei ban wan biang ha ka bor ban ïoh laitluid ha kiei kiei khamtam eh ha ka jingmane Blei, ong u Ma Pala.
Shuh shuh ha ka jingkren jong u, u ong ba ka Congress kan sa kiew biang namar ha kiwei de ki jaka jong ka Ri India ka BJP kan sa nangduna ka jingïoh vote. Kumta ka jingpynbiej jong ka BJP ban ïoh 370 ne 2 na ka 3 bynta khnang ban ïoh ban pynkylla ïa ka konstitushon jong ka Ri India, bad lada kane ka wan jia kata ka ktien “Secularism” kan sa duh noh bad hangta la hap ban don tang kawei ka ktien, kawei ka niam bad kawei ka dustur. Kumta u la kyntu ïa ki nongkyrshan ba kawei pa kawei ka seat ryngkat kawei ka vote ka long kaba donkam ba kin jied da kaba sngewthuh.
Ha kane ka sngi u Ma Pala u la pynsngew ruh ïa ki mat bad ki jingthmu ha kane ka MP ilekshon 2024 kita ki long ban phai khmat nyngkong eh sha ki nongrep lyngba ka rep ka riang kaba biang, ban ïarap ïa ki longkmie, ban ïarap ïa ki samla, bad kiwei de.
Ym tang ba ki dong tang ki jingïakren ne ïa phylliew jingmut, hynrei ha kane ka jingïalang ka la don ruh ka jingjied bad pynskhem ïa ki nongkitkam jong ka South West Khasi District Congress Committee (SWKHDCC), Mahila District Congress Committee bad District Youth Congress Committee.
Shuh shuh ka la don ruh ka jingpdiang sngewbha ïa kiba wan ai jingkyrshan ïa u kyrtong jong ka Indian National Congress (INC) kata kiba wan na ka HSPDP, TMC, BJP, bad PDF.
Kiba la ai jingkren lyngkot ki long u bah Gabriel Wahlang MLA, Nongstoiñ Constituency, u bah V. Thyrniang, Chief Adviser, Mawkyrwat Block Congress, u bah Phrin Wanniang, Adviser MBCC, u bah K. Lyngkhoi, Vice President ka MPCC bad kiwei de.
La pynïaid ïa ka jingïalang da u bah Kynphamlin V. Kharlyngdoh, Convenor, South West Khasi Hills District Congress Committee bad uba la ai ruh ka jingkren khublei.