Shillong, Risaw 07: U General Secretary ka ABVP u Tengku N Marak ba dei jong ka jylla Meghalaya, uba dei ruh na ka seng samla pule u la ong ba kin pynlong ïa ka jingïalang bah kaba lai sngi ha nongbah Shillong mynta u bnai Risaw ka ban sdang naduh ka 25 bad kan kut ha ka 27 tarik.
Haba kren ha ki lad pathai khubor u la ong ba ka seng mynta ka la don ïa ki shnat treikam jong ka ha ki skul, ki Kolej bad ki skul bah bad ha kane ki jingïalam kaba kin ïathir halor ka phang kaba hakhmat eh kaba ïadei bad ka pule puthi bad ka ïoh ka kot.
U Tengku u la ong ba ki samla pule ki ban wan ïashim bynta kin long kumba 500 ngut eiei ïa kane ka jingïalang yn pynlong ha Aurobindo Hall, la pyntip ruh ba ha kane ka jingïalang kin pynthymmai ïa ki nongkitkam ïa u President Vice President, General Secretary bad kiwei ki nongkitkam.
La ong ba ha kane ka jingïalang kaba lai sngi ka ABVP ha ka sngi kaba ar kin pynlong ïa ka jingïaid paidbah ban pyni ïa la ki riam tynrai bad ha ka sngi kaba lai kin sa shim ruh ïa ki rai kiba kum ka seng samla pule kin hap ban shim ïa ka jingkitkhlieh.
La ïathuh ba kum ka seng ki la sdang ban pynrung kyrteng ïa kaba la sdang naduh ka 19/Nailar/2024 bad kin pynkut ha katei ka sngi ba sdang ka jingïalang kaba heh bad ki la buh ïa ka thong la kumno kumno kin ïoh ban pynrung kyrteng 22000 ngut ki samla pule.
