Da ka jingïakop jngi-um pynlong ka SWKHDSA ha ka jingrakhe ïa ka sngi laitluid ba 75 jong ka Ri India

Mawkyrwat, ‘Nailar 17: Ka South West Khasi Hills District Swimming Association (SWKHDSA) kum shibynta jong ka jingrakhe ïa sngi laitluid ba 75 jong ka Ri India, ka jingdap 50 snem jong ka jingïoh ïa ka Jylla ba pura bad ka jingdap 10 snem jong ka South West Khasi Hills District ka la ïoh ban pynlong da ka jingïakop jngi-um ha Phot Umnew, ha kaba ki nongïashimbynta ha kane ki dei napoh jong ka distrik bad kumjuh ruh kiba wan na Shella, East Khasi Hills District.
Lah ban pynkynmaw ruh ba kane ka jingïajop jngi ba la pynlong da ka South West Khasi Hills District Swimming Association (SWKHDSA) ka dei ha ka sien kaba 4 naduh ba sdang ba kum ka association ka la dep ban pynlong ha u snem 2017 bad ha une u snem ki nongjngi ki dang jngi kumba jngi ha ki por ba la leit ne lah ban ong ‘jngi shnong’, hynrei ha u snem 2018 kaba dei ruh ka sien kaba ar, ki nongjngi ki la sdang ban pyni shisha ïa ka jinglah jong ki kum ki nongjngi ha kiwei de ki jaka.
Katkum ka jingïathuh jong u bah Welljune R. Nongsiej, Secretary jong ka SWKHDSA u la ong ba kum ka association ka la ïoh ruh ban phah ïa ki khynnah samla ba kin leit ïa shimbynta ha ka jingïakop jngi ha Bangalore ha u snem 2021, ha ka National Championship jong ka Federation of India ha Bhubaneswar, Odisha mynta u snem 2022 bad kumjuh ruh ha ka Khelo India ha kaba uwei na ki khynnah samla napoh ka South West Khasi Hills District u la shah jied ban mihkhmat.
Haba kren kum ka kongsan, ka kong C. Kharkongngor, IAS, Deputy Commissioner, South West Khasi Hills District ka la ong ka kam jngi-um kam dei ka kam kaba suk hynrei kum ki nongjngi kin hap ban don ïa ka bor bad ka jinglah jong ki ban leh ne jngi. Namarkata, ka la kyntu ïa ki samla ba ban kiew ha ka kam ïalehkai ki dei ban don ïa ka thong bad don ruh ïa ka mynsiem jong ka jingïaleh khnang ba kin poi sha kliar u lum jong ka jingjop.
Haba phai ha ka jingdon jong ki jaka jngi kiba biang, ka kong Kharkongngor ka la ong ba haduh mynta kum ka distrik kam pat don ïa kata, hynrei watla kata ka ai ka jingïaroh ïa ki nongjngi ba ki la trei shitom bad minot ha kane ka kam. Ha kajuh ka por ka la ai ruh ka jingïaroh ïa ka SWKHDSA kaba la pynlong ïa kum kane ka jingïakop kaba long kum shibynta ban sei madan ïa ki nongïa jngi-um kiba tbit. “Haba ngi pynmlien bad pynbyrngia ïa lade ha ki kam ïalehkai ngi lah ban lait na shibun ki kam sniew kiba pynjot ïa ka jingim briew”, ong ka kong C. Kharkongngor, IAS.
Ïa kane ka jingïakop jngi-um la pynshit pynshngaiñ da ka jingïadonlang u bah Kitborlang Nongrem, uwei na ki samla rangbah jong ka dong ka thaiñ, u bah H.S. Diengdoh, President bad ha ryngkat ki nongkitkam jong ka South West Khasi Hills District Swimming Association (SWKHDSA). Ha kane ka sngi la sakhi lang ruh da ka nongpeitkai shynrang bad kynthei.
Ha kaba kut jong ka jingïalehkai, na ka liang ki nongpynïaid ki la ïoh ban sam ruh ïa ki khusnam kiba long da ka Medal bad ka syrnod sha baroh ki nongjop kata ïa ki khynnah shynrang bad kynthei kumjuh ruh ïa ki samla shynrang bad kynthei kiba la wan ha ka kyrdan kaba nyngkong, ba ar bad ba lai, kata ha ka Backstroke ba 50m jong ki khynnah shynrang ki long u Mewanjoplang Iawphniaw, u Kerry Wahlang bad u Maikansam Nongsiej, ha ka Freestyle ba 50m ki long u Mewanjoplang Iawphniaw, u Kerry Wahlang bad u Pynjoplang Iawphniaw. Ha ka Backstroke ba 50m jong ki khynnah shynrang pat ki long u Mebanshan Nongsiej bad u Tosanhame Sangma, ha ka Freestyle ba 50m pat ki long u Alvinson Shylla, u Wanshuwa Thongnikhar bad u Marvelous Marngar. Nangta, ha ka Breaststroke ba 50m jong ki samla shynrang ki long u Rishanlang Lyngdoh, u Medonlang Thongnikhar bad u Mangkyrpang Lyngdoh.
Ha ka Butterfly ba 50m ki long u Alvinson Shylla, u Rishanlang Lyngdoh, bad u Tosanhame Sangma. Ha ka Relay Freestyle 4x50m ki nongjop ki long ka Shella Team, u Meban & Team bad Mawkyrwat Team, katba ha ka Freestyle ba 50m ki long u Banpynshngain Syngwan, u Rangkynsai Myrthong bad u Mebankitbor Banai.
Ki nongjop ha ka Freestyle ba 100 m jong ki khynnah shynrang ki long u Mebansan Sangma, u Banpynshngain Syngwan bad u Jimcliford Syiemlieh, ha ka Breaststroke ba 50m pat ki long u Mebansan Sangma, u James Anderson Kharlyngdoh bad u Fulljunesingh Marngar. Ha ka Butterfly ba 50m ki long u Banpynshngain Syngwan, u Ridaphi Vaichei bad u Edieson Myrthong. Nangta, ha ka Medley Individual 50 m x 4 ki long u James Anderson Kharlyngdoh, u Rangkynsai Myrthong bad u Hilary Wahlang.
Ha ka Medley Relay 4x50m jong ki samla shynrang ki long u Meban & Group, ka Shella & Group bad ka Mawkyrwat & Group. Nangta, ha ka Breaststroke ba 50m jong ki khynnah kynthei ki long ka Pdiangsuklang Syngwan bad ka Anisha Syngwan. Ha ka Freestyle ba 50m ki long ka Pdiangsuklang Syngwan, ka Ilarisuk Youry bad ka Anisha Syngwan. Katba ha ka Freestyle ba 50m ki long ka Pdiangsuklang Syngwan, ka Ilarisuk Youry bad ka Anisha Syngwan.
Ki nongjop ha Freestyle ba 100m jong ki samla shynrang ki long u Selibert Mawa, u Arthemius Lyngdoh bad u Wilbornson Wahlang, katba ha ka Butterfly ba 50m ki long u Khrawkupar Lyngdoh, u Pynkhlaiñ Wanniang bad u Elbaios Wanniang. Ha ka Backstroke ba 50m ki long u Khrawkupar Lyngdoh, u Arthemius Lyngdoh bad u Pynkhlaiñ Wanniang.
Ki nongjop ha ka Breaststroke ba 50m jong ki samla kynthei pat ki long ka June Mary Shangdiar, ka Wandarihun Khyllem Kharai bad ka Banriti Wanniang, nangta ha ka Breaststroke ba 50m ki long ka Wandarihun Khyllem Kharai, ka Antimoris Lyngdoh bad ka Skelnaris Lyngdoh. Ha ka Backstroke ba 50m biang ki nongjop ki long ka June Mary Shangdiar, ka Wandarihun Khyllem Kharai bad ka Banriti Wanniang.