Shillong, Risaw 18 : Ha kane ka juk ba mynta, ym lah ban len ba ka jingnang jingstad hi ka dei ka bynta ba kongsan ha man uwei pa kawei, ki nongshong shnong, watla ka juk ka long kaba shitom ban ïoh kam sorkar ïa baroh. Hadien ba la pyndep ïa ka jingpule, kam pher lada trei kano kano ka kam ruh, hynrei ryngkat ka jingnang jingstad ka kham ïarap ïa ki ban kham pynjanai shuh shuh ïa ka kam ba ki trei bad khamtam ïa kito kiba trei ïa ki kam lajong.
Da kaba ïohi jngai ïa kane, bun ki riew don mynsiem, haka thaiñ nongkyndong, haba ki ïohi ïa ka dong ka thaiñ lajong ba ki khynnnah kim ïoh lad ban leit pule skul, ba ban ka jingduk ïa ki kmie ki kpa, ki phai khmat pat sha kane ka bynta ban seng ïa ki skul kyrpang ïa kumta kita ki longïing kiba don ha u laiñ jong ka jingduk tasam. Kawei na ki skul kaba ngi la sakhi ïa kum kane ka jingthmu ka dei ka skul “Everyshine School Laitpynter Synrangkaban” kaba la seng da i Kong Sylvia Langstieh (bam kwai ha Dwar U Blei) ryngkat ka kynhun jongi, ïa kaba la peit bad pynïaid mynta da u khun jongi u Bah Wallambok Langstieh, kaba don naduh ka Class – Arit haduh Class – VIII.
Ki nongpynïaid jong kane ka skul “Everyshine School Laitpynter Synrangkaban”, kaba don haka shong shuwa ban poi sha Marbisu bad Mawngap, shi bynta ban pyntyllun ïa ki ki kam ki jam bad ki jingdonkam jong kane ka skul, khamtam ban siew tulop ïa ki nonghikai bad kiwei de ki nongtrei, mynta ka snem 2023 ruh haka 20 bad 21 tarik mynta u bnai Risaw kan pynlong ïa ka rynsan ïakob shad, ha kaba yn ai khusnam ruh ïa kiba jop ka ban kot T.30,000-/ baroh ïa ki 3 ngut ki nongjop, ha kaba ki nongïashim bynta haka jingïakob kin hap ban siew tang T.300-/ ka bai rung bad ki nongbishar kin dei i Dapalei Stacy Warjri bad i Daphisha Kharbani. Nalor ka rynsan ïakob shad, kin don ruh kiwei de ki jingïalehkai ban byrngia ïa ki paidbah, ki dukan die bam tynrai bad ki DJ.Kiba kwah ban ïashim bynta ha ka jingïakob ki lah ruh ban phone ha u Mobile Number +91 9863452087.
