Nongpoh, Jymmang 27: Ka jinghap ban mih noh ka Sister Terrina Menezes kum ka Headmistress ka Little Flower Higher Secondary School, Mawbri bad kaba dei ruh ka riewniam kaba la shakri shiteng na ka jingim ïa ka kam jong u Blei, nalor ban kyntiew ïa ka pule ka puthi, ka la pynjaw ummat ïa ki kmie ki kpa ki khynnah skul, ki khynnah skul barim bad wat ki nonghikai ha ka jingkren ba shoh mynsiem jongka, kaba dei ha ka jingïalang leh burom khatduh ba la pynlong da ki bor pynïaid ka skul bad ki Little Flower Past Pupil Association.
Kum ban pynkynmaw, ka Sister Terrina Menezes ka la wan poi ha u snem 1995 bad ka la shim ïa ka bynta kum ka Riewniam bad ka Nonghikai haduh 30 snem bad ka la bat ïa ka kyrdan Headmistress ka Little Flower Higher Secondary School Mawbri haduh 18 snem bad kaba la shakri shithrem ruh kum ka riewniam ha ka kam jong u Blei bad na ka daw ka jinghap ban shongthaid noh shipor ban leit sumar, la pynlong ïa ka jingleh burom kaba la pynjaw ummat lut lut haba phaidien ïa ki jingshakri bad ki synniang ha kam jong u Blei bad ruh ha ka kam ban kyntiew ïa ka pule ka puthi.
Ïa ka jingpynkup burom ne leh burom khatduh ïa ka Sister Terrina Menezes la pynlong ha ka Hall ka Little Flower Higher Secondary Schoool, Mawbri ha ka 23 tarik u Jymmang 2025, ha kaba la sakhi lang da ka jingdon lang u Parish Priest ka Mawbri Parish, u Fr. Balestine Marbaniang, u Fr. Sherman Khongshei, ki Sister, ki nonghikai, ki khynnah skul bad ki khynnah skul barim katei ka skul.
Kiwei kiwei kiba la don lang ha kane ka sngi, ki kynthup ruh ïa u MDC ka Umroi U Bah Isynei Hinge, u Dr. Evarist Myrsing, State General Secretary ka BJP Meghalaya, u Fr. Sherman Khongshei bad kynthup ruh kiwei kiwei de.
Kum ka jingsarong, ha ka jingshakri kaba 30 snem ka Sr. Terrina Menezes kum ka Headmistress ne ka nonghikai, la bun bah ki riew khraw bad ki riew shemphang ba la pynmih da ka Little Flower Higher Secondary School, Mawbri.
La ai jingkren ruh ha kane ka sngi naduh u MDC ka Umroi, u Bah Isynei Hinge bad u Dr. Evarist Myrsing, State General Secretary ka BJP bad uba dei ruh u khynnah skul barim katei ka skul bad kaei kaba ki la pynpaw, ka dei tang ka jingbynnud hadien ba ka Sister Terrina Menezes ka la ha ban shongthaid kum ka Headmistress bad ka nonghikai, kaba dei na ki daw bym lah ban kiar ba ka hap ban leit sumar ïa lade bad shongthaid shwa shipor na ka kam.
Na ka liang kitei ki nongïalam ki la kitbok kitrwiang ruh ïa ka Sister Terrina ba kan dang shaid dang khlaiñ bad ba u Blei un dang kyrkhu ïa ka, ba kan dang lah ban ai ka jingshakri ha ka kam ka jong u Blei bad ruh ban dang kyntiew ïa ka pule ka puthi.
