Jowai, Nailar 01: Kum shibynta ban nohsynñiang ha ka imlang sahlang khamtam ban ïarap ïa u duk u suk, ka Jaiñtia Hills Development Society (JHDS) ha ryngkat ka jingkyrshan ka KHUBLEI Germany kila aiti ïa kawei ka ïing ba lah dep shna ïa kawei ka longïing baduk kaba don ha ka Shnong Mihmyntdu West Jaiñtia Hills District.
Ïa kane ka ïing la noh synñiang da ka ïing ka sem jong ka Hannelore bad U Dieter na ka Ri Germany bad la pynshna bad pynbit pynbiang da ka Jaiñtia Hills Development Society (JHDS) kawei na ki Seng Treimon Sngewbha ha rilum Jaiñtia.
Ïa kane ka ïing ba la dep shna ryngkat bad katto katne ki tiar ba donkam kiba kynthup ïa ki Shuki Sofa, 2 tylli ki palong, 10 kylli ki stole, ka duli ka miej la aiti noh sha ka kong Lumbiang Sana ryngkat bad san ngut ki khun ba dangrit da ka JHDS ha kane ka 01-08-2024.
Shuwa ban aiti ïa kane ka ïing, la don ka prokram ba lyngkot ba la pynïaid da u Bah Denis Kurkalang, Coordinator ka JHDS ha ka jingïadonlang u Fr. Manbha Pakem, Director ka JHDS ryngkat bad kiwei de ki Nongïalam ka Balang Katholik Mihmyntdu.
Shuwa ban ot ïa u ribbon la ïoh ka jingduwai kyrkhu kyrdoh da u Fr. Hilarius Lamare, u Parish Priest ka Jowai Parish ryngkat ka jingsynran lang u Fr. Simeon Sungoh, uba long u GB Member ka JHDS. Ha kaba kut ka prokram, ka Kong Lumbiang Sana kala ai khublei ïa ki nongïarap, kyrpang eh ïa ka JHDS kiba la shim ïa kane ka sienjam ban pynïoh ïa ki kane ka ïing ba paka namar baroh shikatta kila shu shong ha ka ïing ba la jot bha.
