Shillong, Naiwieng 28 : Ki saw tylli ki Village Organisation kiba dei na ka shnong Jongksha bad Thangsning ha ryngkat ka jingïatreilang bad ka Block Mission Management Unit (NRLM), Meghalaya State Rural Livelihoods Society (MSRLS) jong ka ophis BDO Mawkynrew C&RD Block, ha ka 26 tarik u Naiwieng, 2024, ki la plie ia ka ïew die mar rep kiba seisoh lyngba ka rukom thung ka bym pyndonkam dawai sboh kata da kaba shaniah beit ha ka sboh mariang.
Ïa kane ka ïew ha Jongksha la plie da u Bah Banteidor Lyngdoh, MLA ka Mawkynrew Constituency bad ha kane ka sngi ka la don ruh ka jingwan jngoh ruh da ka kynhun Azim Premji Foundation ha ka jingïalam u Chief Operating Officer – Livelihood, Project Manager Natural Farming (Environment), DFS-Livelihood.
Nalor u MLA bad kiba mihkhmat ka Foundation, la ia donlang ruh da u Bah Ricky Mylliemngap, Agricultural Development Officer, Bah Shanlang Lyngdoh, COO Livelihood Promotion MSRLS, ki nongïalam shnong, ka kynhun BBMU, ki nongïalam bad dkhot ki saw tylli ki Village Organisation, Self Help Group, ki nongrep lem kiwei pat.
Ha shwa ka jingplie ia ka ïew, ka la don ka prokram ïamir jingmut halor ban kyntiew ia ka rukom rep khlem pyndonkam dawai sboh kata da kaba ai ia ki jingthung jingtep da ka sboh mariang, ki lad ki lynti ban kyntiew ia ka ïoh ka kot ki nongshong shnong bad kiwei pat ki phang.
Haba kren kum u kongsan ha ka jingïalang, u Bah Banteidor u la kdew ba kam long kaba suk ban pynkylla na ka jingmlien ban rep khlem dawai sboh hynrei donkam ban leh suki suki watla kan shim ia ka por. U ong ba na ka jingiamir jingmut pat la paw ba ki nongrep ki don ka jingangnud ban pynneh bad pynjanai ia ka rukom rep tynrai.
Da kaba ai khublei ia ka shnong Jongksha bad Thangsning kiba lam khmat ia kane ka rukom rep, u Bah Banteidor u la ong ba ia kane la hikai naduh u mynbarim hynrei suki suki ka wan ka jingkylla katkum ka jingïaid ka por.
“Kat nang iaid ka por ka wan ka jingrep da kaba pyndonkam dawai bad ym lah ban leh ka pynsan kloi ia ki jingthung jingtep hynrei lah ban ong pat ba ki don ka jingiapher bad ki mar rep kiba khlem ai dawai sboh”, la ong u MLA uba la bynrap ba ka jingiapher ka khyndew ka dei kaba kongsan ha ka rukom rep.
U la ong ba ha ka thain shane ka khyndew kam da sboh hynrei ka jingrep pat ka khlain bha kum u kubi bad u phan. “Ka don pat ka bynta ba kongsan kumno ban pynïaid iew ia ki mar rep ba khlem ai dawai sboh bad kumta donlang ka jingtest ba kyrpang da ka tnad Agriculture”, u la ong.
U la ong ban ïoh Organic Certificate ka donkam lai snem ban bteng lynter ia ka rukom rep khlem dawai sboh bad kam dei kaba suk bad kum kine ki mar rep ki kham bha.
Da kaba bynrap ba ia ka National Farming ba la sdang da ka Sorkar India hap ban bud ban ïoh ki song jingïarap, u la ong ban ïoh ia kine kiei kiei pat donkam ka jingïatreilang kumba long ha ki Village Organisation bad ki Self Help Group.
