SHILLONG, Jylliew 01: Ka ophis jong u District Social Welfare Officer, East Khasi Hills District ha ryngkat ka jingïatreilang bad ka ophis jong u District Sports Officer, East Khasi Hills District kan pynlong ïa ka jingïakop mareh kaba 5 kilomitar ha ka por mynstep jong ka 03 tarik Jylliew, 2025.
Ka phang jong katei ka jingïakop mareh ka long ‘Run Against Substance Abuse and Illicit Trafficking’ hapoh ka Nasha Mukt Bharat Lo Abhiyaan kaba mut ban pyrshah ïa ka jingkyrni ha ki jingdih buaid bad ka jingkhaïi beaiñ.
La pyntip na ka liang jong ki nongpynïaid ba kane ka jingïamareh ka long na bynta baroh kynthei bad shynrang, ha kaba ki khynnah samla kiba kwah ban ïashim bynta ki lah ban register ïalade lyngba kane ka website, “https://bit.ly/4kkhEf0”, bad ka tarik ba khatduh ban thep kyrteng ka long ha ka 02 tarik Jylliew, 2025 ha ka por 1 baje noh phai sngi.
Ka jingsdang ban mareh kan long na Golf Club-Shillong, nangta sa mareh ter ter ïa ka surok kaba ïaid lyngba ka SRGT Parking Lot-Polo Hills, Shillong Cooperative Urban Bank-Polo Bazar, Forest Colony-MEECL, Chillibreeze Solutions, F.C.I, Shullai Progressive School-Mawlai Mawroh, Head Office jong ka Food Corparation of India, Mawlai Mawroh-Main Junction MPPS bad pynkut ha Golf Club-Shillong.
Na ka liang jong ki nongpynïaid ki la kyrpad ïa ki nongïashim bynta ba kin poi naduh ka por 6 baje mynstep namar yn sdang ban kaweh ïa ka lama ban sdang ïa ka jingmareh ha ka por 7 baje mynstep na Golf Club (Parking Lot), Shillong.
La pynkhreh ruh ïa ka buskit ïa u ne ka nongjop (5k Open Category Male and Female) kaba long T3000 na bynta kiba wan ba nyngkong, T2000 ïa kiba wan ba ar, nangta T1500 ïa kiba wan balai. Nalor kane, yn sam khusnam ruh ïa kiba wan ba saw haduh kiba shiphew (4th to 10th place) kaba long 500 tyngka.
ïa ki Chest number yn sam ha ka 02 tarik Jylliew, 2025 naduh ka por 10 baje mynstep haduh ka por 4 baje nohphaisngi ha ophis jong u District Sports Officer, East Khasi Hills District, Shillong.
