Da ka Committee kular u CM ban thaw ban bishar ïa ki kam halor u mot sahnam ki Garo Labour Corp

Shillong, Lber 27 : U Myntri Rangbah ka jylla u Conrad K Sangma u la bthah ban pynsangeh noh ïa baroh ki kam ha u mot sah nam (Cenotaph) jong ka thma bah ba nyngkong bad u la pynthikna ban thaw ïa ka Committee hapoh shi taiew ban ïakren bniah ïa kane ka mat.
ïa kane ka jingkular u la ai sha ka kynhun jong ki seng bhalang (CSO) kiba don hapoh ka Joint NGOs Forum of Garo Hills, kiba pyrshah ïa ka jingpynpra dang shen ïa u mot jong ka thma bah ba nyngkong, ha ka jingïalang ba long ha ïing sah jong u ha Tura, West Garo Hills District.
Ka kyrwoh ba la pynmih da ki sengbhalang ka la ong ba hadien ka jingïamir jingmut kaba bniah, u Myntri Rangbah u la pynthikna ïa ka kynhun ba yn sa shim ïa ki sienjam ban pynbeit mardor ïa kane ka kam.
“U Myntri Rangbah u la pynthikna ba baroh ki kam ha une u mot yn pynsangeh noh haduh ban da pynbna da kumwei pat bad u la kular ban thaw ïa ka Committee kaba thymmai, kaba leh hok, bad kaba kynthup lang ïa baroh hapoh shitaiew ban ïakren bniah ïa kane ka kam. Kane ka Committee, u kular ba kan kynthup ïa ki Sengbhalang, ki Historian, ki Nongïalam ka thaiñ bad ki Dkhot jong ki Shnong ba shah ktah ban pynthikna ba kino kino ki kam ban shim hadien halor ki kam ha une u mot kan long kaba shai bad ba mynjur lang da baroh,”ïathuh ki seng bhalang
Haba pdiang sngewbha ïa ka jingkular jong u CM, ka Joint NGOs Forum pynban ka la ong ba watla ka jingpynjot ka la dep ban jia, ka rai ban thaw ïa ka Committee kaba thymmai ka long ka jingkyrmen ban ai ïa ka hok bad pynbeit. Ka forum ka la pynpaw biang ruh ba dei ban pynbahklieh ïa kiba donkti ha ka jingpynpra khlem jingbit bad dei ban pyntreikam ïa ki lad ki lynti kiba skhem ban ïada na kum kine ki jingjia ha ki por ban wan.
Ka jingïalang ka la long ka sienjam kaba kongsan ban weng ïa ka jingbym sngewhun jong ki paidbah kaba nang kiew halor ka jingbym don ka jingshai ha ka rukom synshar bad ka jingsngewthuh ïa ka kolshor ha kaba pynïaid ïa ki mat kiba ïadei bad ka pateng tynrai.