Shillong, Jylliew, 25: Ka Hill State People’s Democratic Party (HSPDP) ha ka sngi Baar ka la ai jingmut ba dei ban don noh da ka Combined 80 Percent Reservation na ka bynta ki jaidbynriew Khasi-Jaiñtia bad Garo khnang ban khanglad ïa ka weng ïa ka jingshah shiliang jong kano kano ka jaidbynriew.
Ha ka dorkhas ba la phah sha ka Expert Committee on the State Reservation Policy, u President ka HSPDP Bah KP Pangniang u la ong ba la donkam ban khmih bniah biang ïa ka Reservation Policy ba la pynmih ha ka 12 tarik Kyllalyngkot, 1972 na ka bynta ka jingïabiang lang ha ka ïohkam ïohjam jong ki jaidbynriew bapher bapher ka jylla.
“Ka party ka sngewdei ban don noh ka jingbhah kaba mar 40% +40% kaba long 80% na ka bynta ki jaidbynriew Khasi-Jaiñtia bad Garo khnang ba kan wanrah ïa ka jingïakhun kaba pynhun lang hapdeng ki jaidbynriew Scheduled Tribe jong ka jylla (kata) ki Khasi, Jaiñtia bad Garo, bad ba kan weng ruh ïa ka jingshah leh shiliang jong kano kano ka jaidbynriew,” ong u Bah Pangniang.
Da kaba kdew ïa ka Office Memorandum kaba la pynmih ha ka 18 tarik Nohprah 1972 kaba ïadei bad ka jingmang kyrpang ha baroh ki kam ba lait ha ki District Level , u President u la ong, “ka party ka ai jingmut ba dei buh 90% na ka bynta ki nongthep kam trai shnong ha ki district bapher bapher ka Meghalaya, da kaba buh jingkynmaw ruh ba ka jingthungkam ha ki district ka rilum Khasi bad Jaiñtia ka dei ban long beit thik tang ïa ki ar tylli ki jaidbynriew, kata, tang ïa ki Khasi bad Jaiñtia, katba ka jingthungkam ha rilum Garo ka dei ban long beit thik tang ïa ki Garo.”
“Ha ka para 2 jong ka Resolution kaba ong, “lada don ka jingduna ha ki nombar jong ki Scheduled Tribes bad Scheduled Caste dei ban rah noh shakhmat ha ka sien thungkam jong u snem uba bud bad ban pyndap ïa ka jingthungkam ha uta u snem lane kam dei ban palat ïa ka shisnem. Ka Party ka la ai jingmut ba dei ban pyndam noh ïa kane rukom leh.
U Bah Pangniang u la ïathuh ba ka party ka la tyrwa sha ka Committee ban khmih bniah biang ha kaba ïadei bad ka jingpyntreikam ïa ka State Reservation Policy ha kaba bhah ïa ki Seat pule.
“Naduh ba la pynkha ïa ka Jylla Meghalaya, ka State Reservation Policy kaba la pynmih ha ka 12tarik Kyllalyngkot, 1972, ïa ka percentage la pyntreikam ruh na ka bynta ka bhah pule na ka bynta ki Khasi, Jaiñtia bad Garo khlem da don ïa ka kyndon kaba khlem kdew shai eiei ha ka Reservation Policy. Namarkata, ka party ka sngewdei ban khmih bniah wat ïa kane ruh ka bynta,” u la bynrap.
Shuh shuh u President ka HSPDP u la ong namarba kane ka mat ka long kaba kyllaiñ, ka Sorkar ka dei ban da bishar sani thik pa thik bad ban shim khia bha khnang ba kan ym ktah ïa ka shongsuk shongsaiñ hapoh ka jylla baroh kawei.
“Nalor kine ki jingai jingmut ba la kdew haneng, ka party ka kyrmen ruh ba un mih u soh uba bha na ka jingai jingmut jong ka Committee ba la thaw da ka Sorkar,” u la ong.
