Da ka Coaching Camp & Selection Trial yn pynlong ka TARBD ban jied ïa ki nongïalehkai ba kynsai

SHILLONG, Naitung 23: Ka Taekwondo Association of Ri-Bhoi District [TARBD] hapoh ka Meghalaya Taekwondo Association [MTA] kan pynlong ïa ka prokram kilanmet lane ka coaching camp kumjuh ruh bad ïa ka Selection Trial na ka bynta ki nongïalehkai Taekwondo jong ka Ri-Bhoi District ki ban mihkhmat ïa ka Jylla ha ka 39th National Games 2027.
Kane ka prokram ka ban sdang naduh ka 26 tarik Naitung haduh ka 04 tarik Nailar, 2025 yn pynlong ha Indoor Sports Stadium I.C.A.R .(Umiam), Elaka RiBhoi, bad ka long na bynta baroh shynrang bad kynthei kiba la 15 snem shaneng,
Ka jingthmu jong kane ka prokram kilanmet (training) bad ka jingpyrshang jied (Selection Trial) ka long ban ithuh bad pynkhreh ïa ki nongïalehkai kiba kynsai tam ki ban mihkhmat ïa ka Jylla ha ka National Games.
Kumta na ka liang jong ka Taekwondo Association of Ri-Bhoi District ka pynshlur ïa baroh kiba dei hok bad kiba sngewtynnad ïa ka jingïalehkai Taekwondo ban ïashim bynta shitrhem ha kane ka prokram.
Kane ka thmu ruh ban pynroi ïa ka sap ïalehkai bad ban pynthikna ba ki nongïalehkai kiba kynsai tam kin shah jied ban mihkhmat ïa ka jylla ha rynsan ïakop jong ka ri .
Kane ka Coaching Camp kan long 10 sngi lynter (26 Naitung haduh 04 tarik Nailar), bad ka por kan long naduh 5 baje mynstep haduh 6 shiteng janmiet ha IC.A.R Indoor Hall. Na ka bynta ki jingtip ba kham bñiah phi lah ban phun ha une u nombar:-Jeetu Bagdas (9863083815).