Shillong, Naitung, 20: Tang hadien katto katne kynta ka jingbthah jong ka Hynniewtrep Youths Council Seng Kmie lyngba u President Rangbah ka Seng u bah Roy Kupar Synrem ïa ki shnat treikam jong ka seng ha kylleng ka Bri U Hynniewtrep ban peit pyrman ïa ka rung ka mih jong ki mynder na ka Ri Bangladesh, ha ka sngi Thohdieng mynta ka taiew ki dkhot jong ka ka HYC Ribhoi District ha ka por kumba 7:00 baje janmiet ki lah ïoh ban bat haduh 57 ngut ki briew kiba ki nong Bangladesh kiba la wan lyngba ka Jylla West Bengal sha kane ka Jylla Meghalaya.
Ïa ki video ba la ring hi da ki dkhot ka HYC ba la phah sha ki lad pathai khubor ha ka sngi Saitjaiñ la ïathuh ba lap ïa kine ki briew ha Lad Umroi kiba shong ha kawei ka Bus kaba don ïa u Registration Number WB87-0642.
Haba ki dkhot ka Seng ki pan ïa ki kot ki sla bad tohkit ruh ïa ka leit ka wan ka jong ki, kine ki briew ki la pyni ïa ki Passport bad ki Visa ki jong ki bad ong ruh ba ki thmu ban leit sha Silchar, Assam bad don ruh kiba ong ba ki thmu ban leit sha Shillong bad ban leit shangkai sha Sohra. Hynrei haba kylli pat ïa ka jaka ba ki thmu ban shong bad ban sah miet kine ki briew kim shym lah ai satia ïa ka jubab kaba shai.
Hadien ka jingbymshai ka jubab na kine ki briew, ki dkhot ka seng ki la aiti noh ïa kine ki briew sha ki Pulit jong ka Umïam Police Station khnang ba kin ïoh ban tohkit katkum ka aiñ.
Hadien katto katne kynta bad hadien ba la peit ïa ki kot ki sla, ki Pulit ki la pyllait noh ïa kine ki briew baroh bad la pyntip ruh sha ka seng ba kine ki briew kin leit sha nongbah Silchar, Assam.
Ki dkhot jong ka Seng kiba la buddien ïa kine ki briew ki la lap ba ka Bos kaba kit ïa ki kam shym lah ïaid sha surokbah Bypass ban leit sha Silchar lyngba ka surok Mawryngkneng-Jowai terter hynrei ka la hiar pynban sha ka surok ban leit phai sha Guwahati. Kumta, ki dkhot ki la pynlong ka jingap miet namar kane ka jingleh ka lah pynsuba jur ïa ka jingthmu jong kine ki briew.
Ha ka step sngi Saitjaiñ mynta ka taiew, la pyntip da ki paidbah ba kine ki briew ki la wanphai biang sha Lad Umroi bad nangne ki la kiew pat ha ki kali sumo jong ki trai Jylla ban leit sha Sohra.
Shuh shuh ka seng ka la pynlong ïa ka jingwad jingtip wut wut bad ïoh ruh ïa ki Number kali jong ki kali Sumo kiba kit ïa kine ki briew sha Sohra ban pynlong ka jingpeit pyrman ïa ka ïaid ka ieng jong kine ki brew.
Ki Nongïalam ka HYC ki la pyntip ruh sha ki bor pulit jong ka East Khasi Hills District bad bad ka Sohra Civil sub-Division ban buddien ïa kine ki briew khnang ban pyntikna ba ym dei wat uwei ruh na kine ki 57 ngut ban sah beain ha kane ka Jylla.
“Ngi kyntu ruh ïa ka Sorkar ba kan bthah ïa ki Infiltration Gate ha kylleng ka Jylla bad ïa ki bor Pulit ba kin phikir bha ïa ka jingrung jingmih jong ki briew khamtam eh na ka ri Bangladesh ha kum kane ka por bad ka seng ruh kan peit pyrman bha ban ym ailad ba kine ki nong Bangladesh ba kin ïoh rung bad shong shnong ha rilum Khasi-Jaintia. Ngi khot bad wer ruh ïa ki bor synshar shnong, ki bor synshar Hima ba kin ïa long kiba phikir bad tehlakam ïa ka jingrung jingmih ki briew kiba nabar ha kum kane ka por,” ong u President ka HYC u Bah Roy Kupar Synrem.
