Ban buddien ïa ki samla ba pule shabar ka ri India da ka Online Portal yn buh ka sorkar Meghalaya

Shillong, Naitung 20: Ka Sorkar Meghalaya mynta ka la pynkhreh ban don noh da ka thup lum bad jingtip kaba kyrpang na bynta ki nongshong shnong ka jylla khamtam ki samla pule kiba mih na ka jylla ban leit pule shabar ka ri India.
Kane ka sienjam ba ka sorkar ka shim ka long ban pynsuk bad buddien ia ki samla pule haba don kino kino ki jingjia kulmar ne ki jingiakhih kumba la ju jia ha kine ki khyndiat por ba la dep ha kylleng ki bynta jong ka pyrthei bad kum ka nuksa ia kane ka jingjia ha Bangladesh kaba dang neh haduh mynta.
Haba iathuh ia kane ka rai ba ka sorkar ka shim mynta, u Myntri Rangbah ka jylla, Conrad K Sangma u la ong, “Ka sorkar kan pyrshang ban ioh ka jingmynjur ban pyntreikam da ka thup lum jingpyntip lane ka Portal, na ka bynta ban tip ia ka jingdon ki nong shong shnong ka Meghalaya khamtam ki samla kiba leit pule shabar ka ri India.”
U Myntri Rangbah ula pyntip ba lyngba ka thup jingpyntip lane ka Portal, ki nong shong shnong ka Meghalaya khamtam ki samla pule kiba don shabar ka Ri India, kila ban pynrung kyrteng ialade, khnang baka Sorkar Jylla kan leh iaka ba donkam, lada mih kano kano ka jingiakynnad, ha kino kino ki Ri.
Ula ong ba watla kane ka Portal, kam long kaba donkam eh (Mandatory) hynrei, ki nong shong shnong ki lah ban ai ia ki Phone Number bad kiwei ki jingtip ba donkam khnang baka Sorkar Jylla kan ioh ban buddien ne ai ki lad jingiarap lada jia ba don kino kino ki jingiakhih, jingkulmar ne ki jingiakynad kiba ktah ia ka suk ka saiñ ha kito ki ri
“Kane ka Portal, kan iarap iaka Sorkar ban pynbiang iaki lad lynti ban leit shaw iala ki nong shong shnong,ha ka por ba don ka jingiakynnad,” ula ong.