Da ka 3rd Maitshaphrang Academic Award pynkup burom ka KSU Shangpung Unit

Jowai: Ka Khasi Students’ Union Shangpung Unit ka lah pyllong ïa ka 3rd Mait Shaphrang Academic Award hynnin ka 13-10-23 ha Shangpung Pohshnong Sein Tyllilang Auditorium Hall ha kaba la wan sakhi da ki khynnah skul na ki skul bapher ba don ha katei ka shnong bad ki nonghikai Skul ruh kumjuh.
U samla Pynshaiborlang Rani uba dei u Information and Publicity Secretary jong ka KSU Central Executive Council u la long u Kongsan bad ban shim ruh ïa ka bynta ban pynskhem ïa ki Nongkitkam ba thymmai jong ka Shangpung Unit. La sakhi ïa kane ka sngi da u samla Laitphar Syngkrem President KSU WJHDU, u samla Leningrad Tariang General Secretary ka KSU WJHDU, u Samla Shaniahskhem Dkhar uba dei u Finance secretary ka KSU EKHDU, samla Leibiang Papang Executive member shnong bad ki nongïalam na ka KSU Laskeiñ Circle.
Ha ka bynta kaba nyngkong la sdang shwa da ka Quiz Competition ha kaba la ïashim bynta da ki school bapher bapher bad ïa ka nam jop ïa ka Quiz competition la ïoh rah da ka Lummuroo Secondary School bad kaba wan ba ar da ka Kiri Daloi Secondary School bad kaba wan ba lai ka RMSA.
Ka seng ka la ai khusnam ruh ïa ki khynnah samla kiba wan sha khmat ha ki kam sport kum ka taekwondo, rock climbing, kick boxing bad kiwei kiwei. Ki la don 16 ngut ki khynnah kiba ïoh khusnam haka kam sport bad ka seng kala ïoh ban sam khusnam sha 44 ngut ki khynnah kiba wan sha khmat haka pule puthi ha ki examine bad ki kyrdan ba pher ba pher.
Ha ka tei ka jingïalang u samla Laitphar Syngkrem ha ka jingkren jong u, u la kyntu kynpham ïa ki khynnah skul ba kin ïai minnot haka pule puthi khnang ba shisien ka sngi ïa u lakam synshar ha poh ka bri hynniew trep yn bat hi daki para doh par snam ym shuh da ki bar jylla bad u samla Pynshaiborlang Rani ha ka jing kren jong u, u la sneng la kraw ïa ki khynnah skul ba kin long kiba minot thop bad ban ri ïa ka burom ka akor la ki don hangno hangno ruh bad ba ym juh dei ban don ka jingïasngew pher thaiñ para Khasi.
Haka juh katei ka sngi la pynskhem ruh ïa ki nongkitkam ba thymmai jong ka KSU Shangpung Unit na ka bynta ka samoi treikam 2023 haduh 2026 ïa katei ka jingpynskhem bad pynbam smai lah shimti da u samla Pynshaiborlang Rani.