Shillong, Rymphang 16: Ka jingïakhun hapdeng ka NFU bad ka Raj Bhawan CC ha ka lympung Shillong Cricket League Super Division 2024-25 ba la pynlong da ka Shillong Cricket Association ha madan Polo, hynne ka sngi U Blei ka la jam sha kaba kut ha kaba ka Raj Bhawan ka la khur ïa ka jingjop da 6 wiket.
Ha kane ka jingïakhun u Andrew Ropmay uba la khur ïa ka nam Man Of The Match, u la long u rangïalehkai ba kongsan tam na bynta ka Raj Bhawan, ha kaba u la tyngshaiñ ha baroh ar tylli ki khep, da kaba khur 4 wiket ha ka bowling bad kamai 53 ron ha ka tied.
Ka jingïalehkai ka la sdang ha kaba ka NFU ka la rai ban tied nyngkong bad kamai 159 ron shuwa ban khyllem baroh 10 wiket naki 43 ober, u Ayushman Das u la kamai 37 ron naki 72 bol, katba u Shubham Rasaily u la kyrshan da 28 ron naki 56 bol.
Napdeng ki rangkawang bol jong ka Raj Bhawan u Andrew Ropmay u la khur 4/43 naki 9 ober, katba u Arbin Singh u la khur 3/33 naki 9 ober.
Haba wan ban beh ïa ka thong ka Raj Bhawan ka la lah ban kynjoh tam da kaba kamai 163 ron naki 35 ober bad khyllem 4 wiket. U Joydeepan Deb u la ïaineh haduh kaba kut khlem da shah pynhap (not out) bad kamai 54 ron naki 61 bol, katba u Andrew Ropmay u la lah ban kamai 53 ron naki 66 bol ban khur syndon ïa ka khusnam MOTM, ha kaba ka Raj bhawan ka la jop ïa ka jingïalehkai da 6 wiket.
Watla ka kynhun ka la mad ïa ka namrem hynrei na ka liang jong u Akash (9 over: shah tied 29 ron) bad u Hasin (9 ober: shah tied 37 ron) ki la ïoh ban khur mar 1 wiket.
