Da 3 kol jop ka Langsymphut SC ha ka VII Open Knockout Football Tournament 2025 jong ka FKJGP

Mawkyrwat, Ïaïong 13: Ka Langsymphut Sports Club hynnin ka sngi saitjaiñ jong ka taïew ka la jop pyrshah ïa ka Mawkohmon Football Team da 3 – 0 kol ha ka lympung ïalehkai kynjatbol ba la tip kum ka VII Open Knockout Football Tournament 2025 ba la pynïaid da ka Federation of Khasi Jaiñtia & Garo People’s (FKJGP) Sawsymper Circle ha madan jong ka St. Ferrando Higher Secondary School Sawsymper.
Lah ban kdew ba kane ka lympung ïalehkai kynjatbol ka dei shibynta kum shibynta ban pynmih pisa na ka bynta ban ïarap ïa ki khunswet bad ïa kiba duna ha ka ïoh ka kot ha kane ka dong ka thaiñ Sawsymper bad ha kane ka lympung ïalehkai ka khusnam ka long T. 3 lak tyngka.
Haba phai pat hapdeng ka jingïalehkai hapdeng ka Langsymphut Sports Club bad ka Mawkohmon Football Team ka la long shisha kaba itynnad namar ka jingtbit ki ‘rangïalehkai jong ka Langsymphut SC ha kaba ka la ïoh ban thep 3 kol kat haduh ba kut ka jingïalehkai ka Mawkohmon FT kam shem la lah ban pynphai ïa ki kol ki jong ki ha kaba ka Langsymphut SC ka la long ka nongjop da 3 – 0 kol.
U kongsan ha kane ka lympung ïalehkai kynjatbol u dei u bah Khrawkupar Nongsiej, Chief Organising Secretary jong ka FKJGP Central uba la wan ban plie pyrda ïa kane ka lympung ba la pynlong ha Madan St. Ferrando Higher Secondary School, Sawsymper.
Ha shwa ban sdang ka jingïalehkai la ïoh ban pynlong ka jingïalang ba lyngkot ban pynshai ha kaba ïa dei bad kane ka lympung ïalehkai ba la pynïaid da u bah Runningstar Kharbani, President ka FKJGP Sawsymper Circle ha ryngkat ka jingsakhi lang ki dkhot jong ka seng bad kumjuh ruh na ka seng KSU, HNYF bad kiwei de ki riew rangbah kiba la shah khot sngewbha.
La rwai pynshit pynshngaiñ ia kane ka lympung ïalehkai da ka jingrwai i heprit Rikynti Lyngkhoi bad la ïoh ruh ban sam ïa ka khusnam u ‘rangïalehkai ba tbit kata ïa u Baniatyllilang Mawkhiew jong ka Mawkohmon FC.