Shillong, Rymphang 07 : Ka Lumpyngad CC ka la ïoh ban pynliem noh da 29 ron ïa ka Cluster CC ha ka jingïakhun jong ka Shillong Cricket League, 2nd Division kaba long hynne ka sngi.
Haba phai sha ka jingïakhun, ka Lumpyngad hadien ba ka la jop ïa ka jingkynting pisa ka jied ban tied nyngkong bad ka la ïoh ban kamai 147 ron la 5 wiket ha ki 20 over.
Napdeng ki rangtied, u Mukesh Rai u la ïoh ban tied 54 ron na ki 34 bol, u Akash Cleg Dutta pat u la ïoh ban tied 33 ron ha ki 36 bol. Na ki rang kawang bol pat u Mukesh Singh u la ïoh ban shim ar wiket bad ai kamai 20 ron ha ki 4 over, katba u Vishal Paul u la ïoh ban shim wiket bad ai kamai 19 ron ha ki saw over.
Ka Cluster CC haba beh ïa ka thong pat ka la ïoh ban kamai 118 ron bad liem 9 wiket ha ki 20 over. Ki rangtied ba kham ïalehkai bha ki kynthup ïa u Prashid Pradhan uba ïoh ban kamai 34 ron ha ki 31 bol bad u Govind Sharma uba ïoh ban kamai 17 ron ha ki 12 bol. Na ka liang ki rangkawang bol pat, u Kit Nongkhlaw u la ïoh ban khur ar wiket na ki 18 ron ha ki saw over, katba u Abhay Kumar Rai u la ïoh ban khur lang ar wiket tangba u ai kamai 32 ron ha ki saw over.
Ïa ka khusnam rangïalehkai ba kynsai la ïoh da u Mukesh Rai uba la ïoh ban kamai 54 ron bad khur shi wiket ha katei ka sngi.
