Shillong, Naiwieng 27: Ka kynhun lehkai kriket jong ka Meghalaya ka la shah rem noh da 252 ron ha ka lympung lehkai jong ka U-19 men’s Cooch Behar Trophy pyrshah ïa ka Nagaland, kane ka la wan hadien ba ka kynhun ka la hap haduh 7 wicket shuwa ban wai bam ha ka sngi ba saw kaba dei ruh ka sngi ba ïakhun ba khadduh hapdeng kine ki ar kynhun kaba la pynlong ha MCA Ground, Polo, hynne ka Sngi.
Haba bteng biang ïa ka jingïalehkai na ka 120/3 ha ka sngi ba ladep, ïa kaba ka kynhun ka dang donkam ban kamai haduh 335 ron ban jop, ki rangtied ka Meghalaya ki la shah pynhap baroh tang hadien ba kynjoh sha ka 202 ron kaba la pynlong ïa ka Nagaland khur ïa ka jingjop.
Haba phaidien, ka Nagaland ka la kamai 245 ron ha ka inning kaba nyngkong, bad ka la buh thong da 319/4 ha ka inning kaba ar, katba ka Meghalaya ka la ïohlad ban kynjoh tang sha ka 110 ron shuwa ban shah pynhap baroh ha ka inning kaba nyngkong.
Haba phai sha ka jingïakhun, u Kishlay Vishlux u la lah ban neh slem hynrei u la ïohlad ban kamai tang 36 na ki 141 bo shuwa ban shah pynhap. Katba u Shavian Blah u la shah pynhap tang hadien ba kynjoh sha ka 21. U Charm Marbaniang ruh u la ïoh ban ïarap 21 ron hynrei u la shah pynhap noh ha u Rajesh Das.
Ka Meghalaya kan hap ban mih mynta ka sngi napoh ka jylla na bynta ka jingïakhun kaba bud, bad kane kan long pyrshah ïa ka Sikkim naduh ka 1 tarik Nohprah ha madan Rangpo.
