Byrngem u Syiem Hima Mylliem ban mudui ha Ingbishar pyrshah ïa ki Myntri

Shillong, Risaw, 10: U Syiem jong ka Hima Mylliem u Ainam Manik Syiem u la byrngem ban ujor sha ki bor jong aiñ lada ki san ngut ki Myntri bad Basan jong ka Rai Nongkseh kim lah ban pynshisha ba u lilam ïa ka lyngkhot jaka ha Khlaw Mawroh.
“Ngan hap ïaid shakhmat ban ujor da ka baimynraiñ khmat hapoh ka Ingbishar lada kim lah ban ai ïa ki sakhi sabut kiba biang halor ka jingkynnoh pyrshah ïa nga hapoh shiphew sngi. Nga la hap ban shim da ka sienjam kaba tyngeh namarba kane ka jingkynnoh ka long kum ka jingpynjah burom ïa ka kyrteng jong nga,” ong u Syiem haba kynthoh halor ka jingujor ha ka jingïakren bad ki lad pathai khubor ha ka sngi Palei.
U la ong ruh ba ka don ka jingthoh kaba la mih ha kawei ka kotkhubor ha ka 28 tarik, Nailur, 2024 ba ula die duh ïa kane ka khyndew kum ka nongkynti jong u ka bym long satia ka jingkynnoh kaba shisha.
“Ka dei tang ka jingkynnoh lamler jong ki briew kiba don jingïohnong eiei shalyndet. Kum kane ka jait leh politiks kam dei shuh kaba dang thymmai hapoh ka Hima namar ka jingrhah bor,” ong u Syiem ka Hima Mylliem.
Katkum ka jingong jong u, kane ka jaka kaba heh 5000 sq feet ka dei kaba la ai wai sha ka Kong Naphisabet Wahlang, kaba sah ha ka shnong Mawlai Mawkynroh kaba la pan wai ïa ka jaka namarba ka kwah ban buh ïa ka Furniture Workshop bad ka Welding Unit.
U la lam ba ka Hima ka la aiwai ïa kane ka lyngkhot khyndew namarba ka la don ka jingkyntur jaka.
U Syiem u la ong ba ki la khot ïa ka jingïalang jong ka Executive Committee (EC) bad phah leit sorjamin ruh ïa ka jaka shwa ban aiwai.
“Ngi la shim ïa ka rai ban aiwai ïa kane ka jaka hadien ba ka Executive Dorbar ka ladep phah ïa ka kaiphod sorjamin. Ngi la rai ban buh dor T. 10,000 hajar shi bnai. Ngi la ai aiwai ïa ka jaka na ka bynta 20 snem katkum ki kyndon ba la buh. Ngi lah ban pynthymmai biang sa shisien hadien ba la kut ki 20 snem lada ngi kwah,” ong u Syiem.
U la ong ba ka jingsiew ïa ka baiwai ka long beit sha ka Account jong ka Hima Mylliem ym sha ka pla jongno jongno ruh.
U Syiem u la ong ba kawei na ki kyndon kaba ka ophis jong ka Hima ka la buh ka long ba ka nongshimwai jaka ka dei ban ai kam aijam ruh sha ki samla jong ka shnong.
Haba kylli halor ka jingkynnoh ba ka don ka jingpyndonkam bakla ïa ka pisa kaba kot T. 5.58 klur tam na ka bynta ka jingpynskhem khyndew ha Iew Mylliem Rim, u Syiem u la ong ba um kwah ban kynthoh eiei halor kane namarba ka jingtohkit ka dang don ha ka miej jong ka KHADC.
U la ïathuh ba ka KHADC ka ladep pan jingpynshai la ai sien na baroh arliang mamla.
“Ngi dang ap mynta ïa ka kaiphod tohkit jong ka Council halor kane ka kam. Ngi ladep aiti lut ïa baroh ki jingshisha ha ka por ba ngi la leit mih hakhmat ka Council,” la ong u Syiem.
Haba kylli halor ka jingkynnoh theh khyndew pathar ha Law Syiem haneng ka surok ban leit sha SAN-KER, u Syiem u la ong ba ka khyndew ba la theh ka dei kaba la tih na ka jaka kaba la ai wai 5000 sq feet ha Umshing-Umjapung Mawlai, Shillong.
U la ong ba kam long kaba shisha ba ïa ka khyndew la theh ka jaka jong u bad ïathuh ruh ba ka ophis jong ka Hima ka la bthah wat ïa ki Forest Guard jong ka Hima ban da kdew ïa ka jaka theh khyndew.
Lah ban kdew hangne ba san ngut ki Myntri jong ka Hima Mylliem, ryngkat bad u Basan jong ka Raid Nongkseh, ha ka sngi Balang ki la dawa ïa ka KHADC ban weng noh mardor ïa u Ainam Manik Syiem u Syiem jong ka Mylliem, da kaba kynnoh ba u la aiwai ïa ka jaka ha Khlaw Mawroh khlem ka jingpan jingmynjur jong ka Dorbar Hima.
Ïa ka jingujor la aiti sha u Deputy CEM uba khmih ïa ka tnat Elaka Administration u Bah Pynshngaiñ N. Syiem ïa kaba la soi da u Myntri Nongkhlaw, u Myntri Rumnong Sohsla, u Myntri Kharbteng, u Myntri Nongneng Shanpru u Myntri Syndor bad u Basan ka Raid Nongkseh.
Ki Myntri bad u Basan ka Raid Nongkseh ki la kynnoh ruh ba ka jingleh jong u Syiem ban aiwai ïa ka khyndew haduh 20 snem khlem ka jingtip bad ka jingmynjur jong ka Dorbar Pyllun ki para Bakhraw jong ka Hima Mylliem ka long ka jingleh donbor ïa ka kam synshar khadar bad ka long ruh ka jingpynkheiñ ïa ka kyndon 7 (c) bad (e) bad 4 (A) jong ka Mylliem Syiemship Act 2007 bad ïa ka Administration of Mylliem Syiemship Rules, 2015.
“Ngi sngew kyndit bad sngewsih ban ïohi ba dang shen ha kawei na ki kot khubor Phareng kaba la pynmih ha ka 28 tarik, Nailur, 2024 bad ha ka 1 tarik, Risaw, 2024 halor ka jingleh donbor jong u Ainam Manik Syiem ïa ki kam synshar khadar lyngba ka jinglum pisa beaiñ kum ka bai nguh syiem khlem ka jingkheiñ jingdiah bad ka jingpyrshang ban kam trai ïa ka khyndew Hima kaba don ha Mawlai Mawroh da kaba tih bad bret khyndew pathar,” ong kine ki Myntri bad u Basan.