Byrngem ka FIFA ban sospon ïa ka AIFF lada ym lah pynskhem ïa ka riti synshar

MUMBAI, Nailar 27: Ka Federation International Football Association (FIFA) bad ka Asian Football Confederation (AFC) ki la thoh sha ka All India Football Federation (AIFF), da kaba byrngem ba kin lah ban shah pynsangeh noh lada ym lah ban pynskhem ïa ka riti synshar (constitution) jong ka hapoh ka 30 tarik u Risaw.
“Wat hapdeng ki jingpynthikna bunsien, ka jingbym don ka rukom synshar kaba shai bad kaba ïahap mynta ka la pynmih ïa ka jinglong thylli bad kaba artatien ha ka phutbol India,” la thoh u Elkhan Mammadov, uba dei u Chief Member Associations Officer jong ka FIFA, bad u Vahid Kardany, uba dei u Deputy General Secretary jong ka AFC – Member Association, ha ka shithi kaba la thoh ha ka 26 tarik u Nailar.
Ha kane ka shithi, u Mammadov bad u Kardany, ki la kdew ïa lai tylli ki mat kiba ka AIFF ka donkam ban bud ryntih shuwa ka 30 tarik u Risaw, da kaba pynneh ïa ka jingbym don jingktah jong kane ka synjuk:
Pynthikna ïa ka hukum kaba shai na ka ïingbishar ba ha khlieh duh jong ka ri India (Supreme Court) kaba mynjur ïa ka Riti Synshar jong ka AIFF (AIFF Constitution) ba la pynkylla.
Pynthikna ïa ka jingpynïadei kaba pura jong ka Riti Synshar jong ka AIFF bad ki kyndon ba donkam jong ki Aiñ bad ki kyndon jong ka FIFA bad AFC.
Ban ïoh ïa ka jingpynskhem kaba pura ïa ka Riti Synshar jong ka AIFF ha ka jingïalang bah jong ka AIFF (AIFF General Meeting) ka ban wan.“Lada ym lah ban pyndep ïa ki jingdonkam ba la kdew da ka FIFA bad AFC, lah ban pynshitom ïa ka AIFF, ha kaba ka lah ‘ban shah sospon’.
“Ka jingpynsangeh ïa ka AIFF kan pynlong ïa ka ban duh noh ïa baroh ki hok jong ka kum ka dkhot jong ka FIFA bad AFC, kumba la batai ha ki kyndon jong ka FIFA bad AFC,” la pule ka shithi.
Kane ka lah ruh ban pynthut ïa ka jingangnud jong ka India ban ïohrung sha ka AFC Asian Cup 2027, ha kaba ka wat ïakhun ba lai jong ka lympung ïaknieh rung (qualifier) kan long pyrshah ïa ka Bangladesh bad ka Hong Kong, kaba la buh ban long ha u bnai Naiwieng 2025 bad Lber 2026.
Haba phaidien, ka jingshna ïa ka riti synshar jong ka AIFF ka la ïaid shakhmat naduh u snem 2017, ha kaba la aiti khatduh ha u bnai Naitung 2022 sha ka Supreme Court jong ka ri India.
Nangta ka Kashari ka la shaniah ha u nongbishar ba la shongthait u L. Nageswara Rao ban pyndep ïa ka riti synshar ha u bnai Jymmang 2023, bad ka rai halor kane ka dang sahkut haduh mynta.
Ka AIFF ka la shah khang teng ha u snem 2022 namar ka jingdonbynta kiwei ki kynhun ha ka por ba ka Supreme Court ka la thung ïa ka Committee of Administrators (CoA) ban pynïaid shipor ïa ka synjuk, kaba la weng noh ïa u Praful Patel kum u president.
Kane ka jingshah sospon ka la buh ha ka jingartien ïa ka India ban pynlong ïa ka U-17 Women’s World Cup 2022, hynrei ïa kane ka jingsospon la weng noh hadien ba u Kalyan Chaubey u la shah jied kum u President ha ka elekshon ba thymmai hapoh ar taïew naduh ba la pynjari da ka FIFA.
Ka jingbishar kaba bud halor ka mukotduma riti synshar jong ka AIFF kan long ha kane ka sngi Palei (28 tarik u Nailur).