Shillong, Jymmang 19 : Ka Achik Conscious Holistically Integrated Krima (ACHIK) ha ka sngi Thohdieng, ka la byrngem ban tian bishar ïa u President ka Voice of the People (VPP) bad MLA ka Nongkrem Bah Ardent M Basaiawmoit sha ïing bishar Supreme Court lada duh ki paid Garo ïa ka hok ba dei ban ïoh kat kum ka Job Reservation Policy wat tang 0.01%.
Ka ACHIK ka la ther tyngeh ruh ïa une u Nongïalam ka VPP halor ka jingkynnoh leh drama na ka ishu ba dei bad ka Job Reservation Policy.
“Ngi shem ba kam pynsngewtynnad satia ba u MLA ka VPP ula leh drama halor ka kam jong ka Job Reservation Policy” ong ka General Secretary ka ACHIK ka Advocate Bernita R Marak ha ka kyrwoh.
Haba pynpaw ba kano kano ka rai ba la pynmih da ka ïing bishar ka dei ïa kaban ïasaid tang ha ka ïing bishar, ka Bernita kala ong “Lada u Bah Ardent Miller Basaiawmoit u sngew ba u don sha ka liang kiba shah ktah, u dei ban leit mudui shisyndon sha ka ïing bishar Supreme Court halor ka Job Reservation Policy. Lada don kiba sngew shah ktah da ka hukum lane ka policy, ki long kiba laitluid ban leit sha ïing bishar Supreme Court ha ka jaka ban kynshoit ïa ka jingsngew pher jaidbynriew ka bym sngew ïahap satia”.
Ka Bernita ka la ong “Kane ka ishu kam dei satia ka jingïapher jaidbynriew lane ka ishu ban wanrah ïa ka jingïakynad pher jaidbynriew namar ka kam hi ka ïadei bad kaei kaba dei bad kaba bakla, ka jingbym lah shiliang bad ka hok”.
‘Ka ACHIK ka sngew ba lada u Bah Ardent Basaiawmoit u sngew ba 60-80% ka Job Reservation Policy ka dei kaba hap ïoh ïa kaba la kyntait, u long uba laitluid ban leit mudui sha ïing bishar Supreme Court halor kane ka kam haka jaka ban shu leh drama ban pynkhihwin. Ka ACHIK ka sngew ba ula shim ïa kane ka ishu bad leh kumba ak phlim tang ban pynbyrngia, haba u tip ba u don ïa kiwei pat ki lynti” kala ong.
“Ka ACHIK ka maham ba lada u Bah Ardent u lah ban pynkylla wat tang 0.01% ïa ka hok ba dei ban ïoh da ki jaidbynriew Achik na ka Job Reservation Policy, ka ïing bishar Supreme Court kan dei ka jaka kaba ka ACHIK kan ïakynduh ïa u” ong ka Bernita.
