Byrngem ai dak saw u Deputy CM ïa ki kontraktor ba wanrah nongbylla bar jylla khlem pynbiang kot

Shillong, Naitung 26 : U Symbud Myntri Rangbah ka jylla, u Bah Prestone Tynsong ha sngi ka Thohdieng u la maham ba ka sorkar kan leh syndon da kaba tyngeh wat ban ai dak saw syndon ïa ki kito ki kontraktor bad ki riewshimet ki bym lah ban bud pyrkhing ïa ki kyndon ba ïadei bad ka jingwanrah ïa ki nongtrei bar jylla.
Haba kren bad ki lad pathai khubor, u Bah Prestone u la ong, “Tang kawei ka jingkyrpad jong nga ïa baroh khamtam ïa ki kontraktor, ki kynhun shimet ne kino kino kiba ïadei kam ban wanrah ïa ki nongbylla na shabar ka jylla, ka long ba ngim pyrshah, ka sorkar kam pyrshah hynrei sngewbha ban pyntikna ban pynbiang ïa ki kot ki sla kiba donkam. Lada phim don bad pynbiang ïa ki kot ki sla ba donkam, ka la kham bha ban ym wan namar kata kadei ka jingbakla jongphi ym ka jingbakla jongngi.”
Shuh shuh u ong ruh ba u kyntu ïa ki kynhun shimet ne ki kontraktor ba ki donkam ban shimkhia bha ïa kane ka kam naba lada lap ïano ïano kiba pynkheiñ aiñ kito ki kontraktor hi kiban shah pynshitom bad wat haduh u pud ban shah ai dak saw lada kim lah ban bud ïa ki kyndon aiñ ba la buh.
Ha kajuh ka por u la kyntu ruh ïa ki tnad bapher bapher kynthup ïa ki bor distrik ba kin pyntreikam hok ïa ki kyndon aiñ kiba ïadei bad ka Labour Licence kumjuh ruh halor ka MRSSA,2016.
“La bthah sha baroh ki tnad ba dei peit la ka long ka labour license ne ka MRSSA, ki bor District kumjuh ki tnad ba dei peit ki donkam ban kyndit bynriew namar halor ka labour licence la dep ban buh ïa ki labour inspector haman la ki block,” u la ong.
Shuh shuh u la ïathuh ba kadei ka kamram jong ki ban leit khynra ha kito ki jaka trei ban peit la ki nongbylla ba wan ïalam na bar jylla ki don neem ïa ki kot ki sla kiba biang katkum ki kyndon aiñ jong ka Meghalaya.
U ong ruh ba la bthah ruh ba kin leh da kaba tyngeh ba kino kino ki jingtrei kiba don ha u pud u sam jong ki, kin hap ban leit jngoh bad kylli bniah ia ki kot ki sla la ki don neem,” bynrap biang u Symbud Myntri Rangbah.