Bynnud ki parabangeit ba hap mih noh ki Lyngdoh Sohblei na ka Parish Pynthorumkhrah

Shillong, Naitung 05: Ka Shnat Niam Pynthorumkhrah u Nongda jong u Petrus bad Paulus Bakhuid ryngkat ki paid U Blei ka la ai burom bad sngewnguh ïa U Blei halor u lyngdoh Nongsharai u Sohblei Laurence L. Nongkseh u Nongsharai Rangbah ba la sharai ïa ka Bri Sohwaiñ la 7 snem ïa kaba u la shimti naduh u snem 2019 u Jylliew haduh u 2026 Naitung.
U Sohblei Laurence Nongkseh kum u Nongsharai Rangbah ka Shnat Niam Pynthorumkhrah (Parish Priest) uba wanshimti ha ka por ka khlam ka ngoh Covid 19 hynrei kum u Nongsharai u la Synniang bynhei ïa ka jingim mynsiem jong u hapdeng jong katei jingpang khlam.
Ka Shnat Niam Pynthorumkhrah ha ka jingai khublei kitbok kitrwiang ïa u Sohblei Laurence shwa ba un leit shimti kam noh sha ka Shnat Niam Nongpoh Assumption Parish ïa kaba la pynlong da ka Parish Pastoral Council myn ha ka 5 tarik u Naitung 2026 ha Parish St. Peter Hall.
U Sohblei Laurence haba ai khublei ïa ki paid u Blei ka Shnat Niam Pynthorumkhrah kumjuh ïa ki seng jong ka Shnat Niam naduh ki seng Samla, Kynthei, Seng Rangbah, KBB bad ki khynnah skul kiba la ïatreilang bad u ha ki 7 snem, u Sohblei Laurence u sngewnguh ïa ka Pynthorumkhrah namar kam eh ïa u ban treikam namar la kit hi da ka Parish Council naduh ki pynlut bad ki kam ba eh wat ki kam mynsiem ka kham sting haba u ïanujor ïa ki parish ba u la trei u hap ban tip lut ïa ki jingdonkam jong ka parish.
Ha Pynthorumkhrah u la ong ba u sting palat ki kam um khuslai namar ka parish kaba la biang la bit ha ki kam pynïaid.
Kum ka jingai khublei khatduh shwa ban mih na Pynthorumkhrah u Sohblei Laurence ryngkat u lyngdoh Synrop u Sohblei UB Joseph ki la pdiang ïa ka jingburom ne ka Farewell ha kaba ki 6 tylli ki Catholic Managing Committee ki la ai burom da ki jinglehkai kiba kynthup ïa skit, jingrwai katba na ka liang u Sohblei Laurence L. Nongkseh u la pynhun bad pynlung mynsiem ïa ki paid u Blei ka Pynthorumkhrah da ka jingput saxophone bad ka jingrwai.
Kaba pynshoh mynsiem palat ïa ki phadar ban leit noh ka dei ïa skit jong ka Jingkhot jong u Jisu ïa ki Nongtong dohkha ban long ki nongbud jong u kum ki Apostol ïa ka pynbiang pynbit da ka Seng Rangbah.
Ha ka skit ba la khot ban bud ïa U Jisu ka dei ban leit ïalap tong briew bad pynlong synran bad aiti ïa ka bor ba ki la ïoh pateng ban pynbaptist.
Na ka liang ka Parish Council ka la pynpaw ka jingbynnud ïa ka jingieh ïa ka Pynthorumkhrah hynrei ka long ka jingkyrmen pat ïa kiba dang donkam, ïathuh u Bah David T. Umdor Vice Chairman.