Shillong, Risaw 22 : Ka Bharatiya Janata Party (BJP) ka la pynpaw ïa ka jingbynniaw halor ka jingkyrduh kam kaba don mynta ha ka jylla Meghalaya baroh kawei.
Halor kane, u President ka Meghalaya BJP, Bah Ernest Mawrie u al ong ba wat hadien 50 snem ka jingsynshar jong kiba bun ki sorkar ruh hynrei ym pat lah pat ban pynmih bun ki kam ki jam na ka bynta ki samla hapoh ka jylla.
U la kam ruh ba ka jingïohi jong ka sorkar halor katei ka bynta ka long khim bha bad bun ki polisi treikam jong ka sorkar kim shym la lah ban kot sha ka thong. U la kynnoh ruh ba wat ki nongmihkhmat paidbah ruh ki khlem lah ban pyndep ïa ka kamram kum ki nongthaw ïa ki polisi.
Na ka liang u Bah Mawrie u la ai khublei ruh ïa u Myntri Rangbahduh ka Ri, u Narendra Modi na ka bynat ka jingpyllait paidbah ïa ka ‘Raozgar Mela’ kaba la mang haduh 10 lak tylli ki kam sorkar ha ka sorkar pdeng ban ai sha ki samla ka ri.
U pynpaw ruh ïa ka jingkyrmen ba ki samla Meghalaya ruh kin myntoi lang na kane ka skim. Shuh shuh u ong ruh ba ka sorkar jyla kam la lah satia ban pynmih kam pynmih jam na ka bynta ki samla nalor ba ka khlem lah wat ban pyndap ïa ki kam ba dang thylli. U kdew ruh ba katkum ka jingwad RTI ka kdew ba ki la don haduh kumba 8000 tylli ki kam kiba shong thylli ha kylleng ki tnad jong ka sorkar jylla.
U Bah Mawrie u ong ruh ba ka Meghalaya ka donkam ïa ka sorkar ban ïalam da ka BJP kaban pynleit jingmut ban pynkylla ïa ka Meghalaya sha ka jylla kaba lah ban pynmih bun ka khajna bad ruh kaba lah ban shaniah dalade ïalade bad ruh ban long ruh kawei na ki jaka ba lah ban aikam aijam ïa ki samla.
Da kaba kdew halor ka jingmih ki samla ban kdew ïa ka jingkyrduh kam kyrduh jam, u Bah Mawrie u ong ruh ba kane ka mat ka ïahap lang bad ka jingthmu jong ka BJP. U la ïai ban ruh ba ka sorkar ban wan hapoh ka jingïalam jong ka BJP kan sa peit ïa kitei ki ishu kiba ïadei bad ka ïohkam ïohjam ha ka jylla hakhmat eh.
Ka BJP ka pynkhreh ruh mynta ïa ka prokram ba 100 sngi ba hakhmat eh na ka bynta ban pyntreikam mardor mar ïa jop bad wan ha ka bor ha ka jylla.
