Nongstoiñ, Nailur, 22: U MLA ka Rambrai-Jyrngam Remington Gabil Momin, u la pynpaw ïa ka jingsngewkhia halor ka jingslem ban treikam jong ka Block ba dang shu pynkha thymmai, ba la tip kum ka Rimuliang C&RD Block ha West Khasi Hills District.
Na ka liang u Bah Momin u la pynpaw ba kane ka Block ka dei kaba la mang tyngka naduh u snem 2022. Hynrei ka jaka ban buh ïa ka Rimuliang Block haduh mynta ym pat lah rai satia. Na ka liang u Deputy Commissioner u donkam ruh ban pynlong ïa ka public hearing ban rai ïa kane namar ka Block kam pat treikam ei ei satia.
U MLA u la pynpaw ba na ka daw ka jingbym don kane ka Block thymmai, baroh ki skhim jong ka Rimuliang Block ki dang hap ban ïaid lyngba ka Mawshynrut bad Nongstoiñ C&RD Block. Kumta ka la eh than ban pynïaid beit ïa ki kam kumba dei ban long.
U pyntip ba ïa kane ka Block la pynbna hashuwa jong ka elekshon MLA 2023 bad ka jingpynslem ka la pynbitar bha ïa ki paidbah ka constituency. Na ka liang u MLA u la pyntip sha ka Sorkar, kynthup sha u Myntri ka C&RD ar taiew mynshuwa. U la dep ai ruh ïa ka thup kyrteng jong baroh ki shnong ki ban sa phiah hapdeng ka Rambrai bad Nongstoiñ Block.
Na ka liang u Myntri ka Tnad C&RD AT Mondal u la kular ban sa khmih ïa kane ka jingpynsngew jong u MLA bad ong, “Ngi dang pynkhreh shaid shaid ban pynlah treikam noh shen ïa kane ka block, namar katba nang kloi katta nang bha. Ngi la tyrwa ruh ban shna ïa ka Building kaba paka na ka bynta ki 9 tylli ki Block thymmai ba la pynkha ha u 2022”, ong u Mondal.
Ka Rimuliang C&RD Block kan kynthup haduh 72 tylli ki Shnong kiba kynthup ïa ka Langpih Ranighat, Moipara, Umshiak, Salpara, Aradonga, Rangolpara, Rangsapara, Kamphaduli, Athiabari, Umsaitwait, Balapara (Nongshyiap), Sohmarang, Nongdron, Noapara bad kiwei kiwei.
