Nongstoiñ, Risaw, 01: Namar ka jingbym lah shuh jong u kontraktor ban trei pyndep ïa ka surok na Nongjyllieh sha Sangriang, ki paitbah jong ki shnong ha katei ka thaiñ naduh Lawse, Sohparu, Sangriang, Mawduh, Diengsyiang, Nongkhnum bad kiwei kiwei ki shnong ki la thnum bad bynñiaw haduh katta katta.
U bah Ïoanis Ïawren uwei na ki nongïalam shnong katei ka thaiñ haba ïakren bad u nongthoh khubor, u la ong ba naduh ba ka sorkar ka la pynbna ba ka jingpynbha bad siang rong ïa ka surok na Nongjyllieh haduh Sangriang bad ba u kointraktor u la sdang ban pyntrei thohmut thohmat, ki paitbah ki la kyrmen ba katei ka surok kan sa bha bad ki paitbah kin ym jynjar shuh ha ka leit ka wan.
Hynrei u kontarktor u ba pyntrei ïa katei ka surok um shym la shimkhia ban pyndep. Nalorkata ka jingpyntrei ruh ka long kaba torti bha, namar ba ki bynta kiba la dep siang rong ki la jot la pra lut hynrei ki don pat ki bynta ba tang ban siang rong ruh um pat dep.
Haba ïaid lyngba katei ka surok, la lap ba ka jingbym lah pyndep shuh jong u kontraktor ban siang rong ka don kumba ar kilomitar ei ei. Nalor kata ka surok ka long kaba khohruh khohram bad ki maw ba la sdang ban siang ki la pra lut bad don ki jaka ba wat tang ki maw ruh ym ïohi shuh ha surok.
Halor ka jingbym lah pyndep jong u kontraktor ban siang rong ïa katei ka bynta kaba dang sah, ki nongñiah taxi kamai ki la ong ba tang na ka daw jong ka jingbym pyndep jong u kontarktor ban siang rong ïa katei ka bynta ba dang sah, ka jingkamai kali kam don jingmut shuh.
Namar lada kit san ngut ki nongleit nongwan na ki shnong kiba don ha katei ka thaiñ shisien leit ka dang mih tang sawspah tyngka, ka bai shna kali pat hynriew spah haduh shihajar tyngka, ka bai petrol sa ka bai sha jong u nongñiah bad lada kheiñ sa kiwei kiwei ki jinglut kam ïahap shuh.
Ki la ong ruh ba man ka por ki la ju dawa bad pynsngew sha ka ophis PWD ba kan kyntu bad bthah ïa u kontarktor ba un pyndep hynrei kam poi shaei shaei ruh. Nalor kata ki la ong ruh ba ka jingpynsahteng ban siang rong ïa katei ka surok ka la pynngiah ruh ïa ki nongshang kai suwari ba kin leit sha Nongkhnum bad Weinia bad ka la pynhiar arsut ïa ka nam jong ka dewlynnong Nongkhnum.
Ki la ong ba kin ïaishah mynta sa katto katne por, hynrei lada u kontraktor um pyndep ban siang rong ïa katei ka bynta ba sah kin sa ïaid noh da kiwei pat ki lynti, ban dawa ïa ka sorkar ba kan ym pyllait ïa ka bill jong u katba um pat lah ban pyndep lut ïa ka jingtrei.
