Nongpoh, Naiwieng 12: Ki dkhot ka HITO mynta ka sngi kila leit ban pynsangeh shipor ïaka jaka lum khajna (Toll Gate) jong ka National Highway Authority of India kaba don haka shnong Pahammawleiñ 20 mer, hadien ka jingujor jong kawei ka longkmie kaba trei ha katei ka khyrdop namar ba kam shym la ioh tulop mynta la kumba 1 snem tam kaba la pynbitar ïaki nongïalam seng.
Tang hadien ka jingioh jingtip halor ka jinghiar jong ki kynhun sengbhalang naka liang ki bor pynïaid district kila hiar mar mar sha katei ka jaka naka bynta ban tem ïa kano kano ka huri hura kaba lah ban mih ha katei ka jaka kaba ktah ïaka shongsuk shongsaiñ jong ki paidbah.
Hadien ka jingpoi jong ki bor pynïaid district, kila ioh ruh ban ïakren bad ki nongïalam seng naka bynta ban pynbeit ïaka huri hura ha katei ka jaka khrong khajna tang nakadaw ka jingbym siew tulop ïa katei ka longkmie kaba trei ha katei ka jaka khrong khajna.
Ha katei ka jingïakren ki nongïalam seng bad bor district, kala mih ruh ka thma ktien ba shipor, hynrei da ka jingkren sngewthuh naka liang ki bor district kila mynjur ban shimkhia ïa katei ka jingeh bad ka jingdawa jong kitei ki nongïalam seng kiba la dawa ba katei ka kompani ka dei ban siew dep noh ïaka bainong jong katei ka longkmie, ha kaba naka liang ki nongïalam seng kila mih noh na katei ka jaka hadien ka jingkular.Caption: Ki samla pule jong ki 6 shnong haka thaiñ Sohlait kiba la shah pynkup burom haka Synjuk ki seng Samla bala pynlong haka shnong Sohlaitrim.
