Nongstoiñ, Naitung, 14: Namar ka jingbym don kali kit nongpang ha Rambrai PHC la shisnem kynthih, ki nongïalam ka Federation of Khasi Jaiñtia & Garo People Rambrai circle, ha ka sngi palei ki la leit ban ïakynduh ïa ka District Medical & Health Officer jong ka West Khasi Hills ha ophis trei kam jong ka na ka bynta ban ïakren halor katei ka mat.
Haba ïakren bad ki nongïalam ka seng hadien ba ki la mih na kamra treikam jong katei ka ophisar u bah Fulmoon Marweiñ Organising secretary, ka seng u la ong ba katei ka ophisar ka la ong ba na ka liang ka ophis ka la dep pyntip sha ka sorkar ha kaba ïadei bad ka jingbym don kali kit nongpang shuh ha Rambrai PHC bad ka sorkar ka la pynkhreh ban ai na ka bynta ban kit ïa kiba pang ba shitom.
Nalor kata utei u nongïalam ka seng u la ong ruh ba ki la pynsngew ruh ha kaba ïadei bad ka jingduna nongtrei ha ki Sub Health centre. Hynrei katei ka ophisar ka la pynshai ba katkum ki kyndon treikam jong ka sorkar ym lah ban thung bun ngut ki nongtrei ha ki Sun health centre, hynrei tang ar ngut bad ha baroh ki Sub health centre kum ha Mawlangsu, Mawlieh, Mawdoh bad Mawdumdum ki nongtrei ki la don.
U la ong ruh ba katei ka ophisar ka la ong ruh ba ka sorkar kan sa ai biang sa kawei ka Sun health centre ha ka shnong Mawkhiat bad yn sa pyntrei noh shen ïa katei ka jaka sumar.
U bah Marweiñ u la ong ruh ba ka seng ka la aiti ruh ïa ka jingthoh sha katei ka ophisar, ban pynkynmaw ba ha ki saw tylli ki sub health centre kiba don ha ka thaiñ. Na ka liang ka DM&HO ka la pynshai ba ka la leit ban khmih hi dalade bad ka la lap ba ki nurse kiba trei ha kitei ki jaka sumar ki trei shitom bha. Ka la pynshai ruh ba ki don ki kali kiba ka sorkar ka la pynkhreh na ka bynta ban leit kit ïa ki longkmie kiba armet na ki shnong bad ban pynpoi sha ki PHC shisien man la ka shitaïew, ba kin wan phah check up bad kim donkam ban siew pisa haba ki leit shaw bad ki leit on ïa ki.
Hynrei na ka liang ka seng kam pat ju lap ba ki don kita ki kali kiba wan shaw ïa ki longkmie ba armet na ki shnong ki thaw, namar haduh mynta haba ki leit phah check up ha PHC, ki dang hap ban shu wai da ki kali kamai bad ki kali jong ki riew shimet bad halor katei ka jing ong jong ka DM&HO ka seng kan sa buddien ban lap ïa ka jingshisha.
U la ong ba ki la pynkynmaw ruh ha kaba ïadei bad ka jingpynbna jong u Myntri Rangbah ha shuwa ka Election ba yn kyntiew kyrdan noh ïa ka Rambra PHC sha ka CHC, hynrei ka DM&HO pat ka la ong ba haduh mynta kam pat don kano kano ka jingpyntip na ka sorkar, ba kan kyntiew kyrdan ïa katei ka PHC sha ka CHC bad ka la pynlyngoh haduh katta katta ïa ka seng.
Kumta ha kaba ïadei bad katei ka mat ka seng ka kyntu ïa ka sorkar ba ka dei ban shimkhia bad wad jingtip bniah ha kaba ïadei bad ka jingtreikam ha katei ka PHC, namar lada kheiñ katkum ka jingdon briew ha katei ka thaiñ ka Rambrai PHC ka la dei hok ban kyntiew kyrdan noh sha ka CHC.
