Bym burom ki Nurse ïa ki nongpang bad bym biang ka jaka sumar, pynsngew ka HYC ha u M&HO

Mairang, Nailar, 25: Ka Hynniewtrep Youth Council (HYC) Nongkasen Unit hadien ba ka la ïoh ïa ka jingujor na ki paidbah jong ka thaiñ halor ka jingbym biang ka jingai jingsumar bad ruh ka jingbym burom ki Staff nurse ïa ki nongpang ha ka ktien ka thylliej, mynta ka sngi 23 Tarik Nailar ka la leit ban kynduh ïa u Medical & Health Officer jong ka Markasa PHC ban ïakren halor katei ka bynta.
Na ka liang ka seng hadien ka jingïakynduh bad u Doktor ba dei khmih ïa katei ka PHC ka la ïathuh ba na ka liang u Doktor ula kular ba un shimkhia halor ki jingshem jingeh jong ki paidbah halor ka jingbym burom ka ktien ka thylliej jong ki staff nurse ïa ki nongpang bad ha kaba ïadei pat bad ka jing bymbiang ka jingai sumar ha kane ka hospital, la ïathuh ba ka daw kaba kongsan ka long ba ha katei ka jaka ai jingsumar don tang uwei u Doktor bad u hap ban peit hi marwei ïa kiba bun ki nongpang na kane ka thaiñ kaba don palat 70 tylli ki shnong bad kane ka la buh jingeh ïa u ban ai ka jingshakri kaba bha.
Bad na ka liang ka seng HYC kala dawa ruh na ka sorkar ban thung buh shuh sa kumba 2 ngut ki Doktor ban peit lem ïa kane ka PHC khnang ba kane ka jaka ai jingsumar kan lah ban ai ïa ka jingshakri kaba bha ïa ki paidbah.