Man ka por, la ïohi ïa ki prokram ot ribon, ki jingbuh maw nongrim ha kylleng ka Jylla bad ynda la dei ka por shong dorbar, la ïohi ïa bun bah ki jingïakren halor ka jingmang bad pynlut pisa ka sorkar ha ki tnat bapher; hynrei ka jingkylli ka wan hangne, ba shaei katei ka pisa ka leit bad la ka la pynmyntoi ne em ïa u nongsiew khajna, uba hap ban siew rem dor ïa ki tiar ki tar, tang namar jong ka khajna?
Ka jingshisha, ka long, ba lada phi tei ïa ka dukan heh, uba myntoi hakhmat duh, u dei u kontraktor bad ki nongbylla jong u, lada dei ki nongbylla khasi ne ki nongbylla dkhar, katba ynda la dep tei, lada ka dukan ka ïaid, ki myntoi sa kiba shong dukan, hynrei lada kam ïaid, kumta kan shu dei noh tang ka jingtei nam jong ka sorkar.
Kumjuh ruh, haba trei ïa ka surok khamtam kum ha kine ki sngi, ba ka jot lut khait, kiba myntoi, ki dei ki kontraktor bad ki nongbylla jong ki lem bad ki nongdie tiar die tar, hynrei lada katei ka surok, ka jot noh lane ka dei sha ki jaka bym don kali, kumta ki ïoh kabu pynban sa ki nongleit bri leit bsah lane ki nongsharai blang sharai masi.
Haba peit ha kine ki sngi, la ïohi, ba ka jingtrei jong ka sorkar, kaba pynmyntoi shisha, ka dei ïa ka skhim 100 sngi, ha kaba ki riew paidbah, ki ïatei hi ïa ki lynti ïaid kjat, ïa ki jaka sum, ïa ki nala, ki kynroh bad kumta ter ter bad lait nangta, ka wan sa kawei ka skhim, kaba dang ïaid bha ha kine ki sngi bad kata ka long ka jingtrei ïa ki ïing baduk, ha kaba ym don da kiwei pat kiba lushia, hynrei ki dei hi ki trai ïing kiba rai ïa ka jingheh ne jingitynnad jong ka ïing, kiba siew hi ïa ka bai misteri bad ba ki briew jong ka sorkar, ki shu peit bniah, ba ka kam kan ïaid beit bad ba kan nym sahkut tang shiteng.
Kitei ki dei ki skhim jong ka sorkar India, hynrei kiba bun ki skhim, tang shu la aiti ha ka sorkar jylla, la ïohi, ba ki ïa tare kito kiba ïajan bad ki minister bad ki ophisar bad kine kin pynpulom lut ïa ki kam ba bun, da kaba kin bam kham bun ïalade bad kin sa pynlut ïa kaba tam bad dei na kata ka daw, ba ki kam kim ju ïaid beit satia bad ki shu sahkut lane ki sniew noh tang shipor, namar ba ka jingpyntrei, ka dei kaba torti haduh katta katta bad kam dei tang katta, hynrei la ïohi, ba ha kiba bun bah ki skhim jong ka sorkar jylla, ba ki paidbah kim ju don bynta ha kaba shna kamai ïalade, namar la ju ai ïa ki, tang ïa kaba la dep lane kaba la pyntrei da kitei kontraktor lane ki ophisar jong ki tnat bapher.
Ka nuksa kaba biang tam ban ïakren ïa kane ka mat, ka dei ïa kito ki skhim elekshon jong kane ka sorkar NPP, kiba ka la shu bret kai ha madan ha shwa ka elekshon 2023 bad kitei ki kynthup ïa ka skhim ïarap nongrep, kaba saw hajar, sa ka skhim sam khun syiar bad khun sniang, ka bym don jingmih eiei ruh em, hynrei kaba la shu pynkit khia ïa u paidbah, ha kaba siew ïa ki ram ki shah jong kiba kum kitei ki ram.
Kat haduh mynta ym ïohi ïa kiwei pat ki skhim kiba ai kamai ïa ki riew paidbah jongngi, lada dei ha ka rep, lada dei ha ka ri jingri, lada dei ha ka kam shang pyrthei; hynrei la shu pynlut phut ha ki jingtrei kiba heh ba heh bad kiba ailad ïa ki heh spah heh hajar, katba kitei kin shu sah kum ki jaka teinam, lada ki paidbah kim ïoh ban kamai bai sngi ïalade, katba ïa ka jinglut la shu leit shim da ka ram na ki Bank bapher jong ka pyrthei.
