Shillong, Nailar 21: Ha ka 2 tarik mynta u bnai, ka tnad Health Dept, ka la pynmih ïa ka Advertisement ban khot treikam Nurse na ka bynta shi snem halor ka contract basis, ïa kaba lah ruh ban pynjlan lada donkam katkum ka jinglah treikam kiba shah thung. Ki post kiba lait katkum kane ka jingpynbna ki long 288 tylli.
Kane ka Advertisement ka la bthah ïa kiba la pyndep ïa ka jingpule kam Nurse na ki Institute ne ki Nursing School ba la ithuh da ka Indian Nursing Council bad kiba la rejistar bad ka Meghalaya Nursing Council bad kin hap ban aplai online lyngba ka website jong ka Health Department.
Kiba lah ban aplai kidei kito kiba hapdeng 18 haduh 27 snem ka rta bad ka tarik ba khatduh pat kadei 9 tarik mynta hi u bnai, kaba mut ki samla ba ladep pule Nurse ki ïoh por shi taïew ban aplai.
Katkum ka jingïathuh ba kine ki Samla ba ladep ban aplai online bad ïa ki admit card na ka bynta ban leit thoh eksam na ka bynta ka interview la bthah ban download na ka website.
Hynrei kiba bun ki samla baladep ban aplai ïa kine ki post ki la ïathuh ba ka eksam na ka bynta kine ki post ki la ïathuh ba haba ki la download ban sei ïa ki admit card, la shem ba ka kyrteng jong ki kam don satia, wat lada ha ka por ba thep aplikeshon online ka la pynpaw kala biang ne ka long successful.
Da kaba sngewlyngngoh ïa kane ka jinglap, kine ki samla ki la mareh ban leit kylli na ophis DHS namar ba ka eksam kan long ha kane ka sngi Saitjaiñ, kata ha ka 26 tarik mynta u bnai.
Hynrei ynda ki la poi ha ophis DHS la ïathuh da ki nongtrei ba na ka liang jong ki, kim lah ban leh eiei namar ba na ka liang ka jingpynmih jingpynbna ne ka advertisement ka la kren shai ba download beit na ka website. Kila ong ruh ba kim lah ban leh eiei shuh, lada ka kyrteng kam mih haba download na ka website.
Na ka liang kine ki samla ki la pynpaw ka jingdiaw mynsiem halor kane ka jingïashem jong ki bad kim tip shuh shano ban phai, haba ka kyrteng jong ki kam don haba mut ban sei ïa ka admit card. Ki la pynpaw ruh lada dei bym long ha ka por ba leh aplikeshon online ruh ka ladei ban pyni ne ban pynpaw ba ym pat biang ka rukom pyndap ïa ki form. Kine ki samla ki la pynpaw ka jingsngewlyngngoh halor kane ka bynta bad mynta ki shu ap ïa ka jingpynshai na ka DHS lada don kino kino ki jingbym ïaid beit.
