Bun ki samla ba la nang la stad ki kynroi prie lada kren ïa ka ishu politik : Bah Prestone

Shillong, Nailur 24 : U Symbud Myntri Rangbah ka jylla ba dei ruh u National Vice President ka National People’s Party (NPP) ha ka sngi Saitjain u la ong ba ki samla ba la nang la stad kim dei satia ban kiar na ka politik namar khatduh kin ym lah hi ban lait na ka.
“Nga pynshlur ïa ki samla ba la nang la stad ba kin tur shakhmat ban don bynta ha ka politik namar ha kaba khatduh katba dang don ha ri India donkam beit ïa ka politik,” ong u Bah Prestone ha ka rynsan jingkynduh lang jong ki samla NPP ha Pynursla constituency ba la pynlong da ka National People’s Youth Front ha kane ka sngi Saitjaiñ.
Utei u MLA ka Pynursla u la ong ruh ba u kren khnang ïa kane namar u ju ïohsngew ba ki don ki samla ba la nang la stad kiba tang shu kren politik ki la kynroi prie bad pynpaw ba kim sngewtynnad satia ban kren halor katei ka phang.
“Kane kadei ka jingsdang na Pynursla constituency bad nga sngewkmen ban ïohi ba ki samla kynthei bad shynrang kiba la nang la stad mynta ki la mih shakhmat. Phi dei ban ai jingmut ïanga ruh ïa kino ki kam kiba dei ban leh na bynta ka constituency bad ruh wat na ka bynta ka jaidbynriew bad ka jylla hi namar dei maphi ki samla kiba kham ïohi jngai namar phi dei ka lawei jong ka jylla,” u la bynrap shuh shuh.
Shuh shuh u ong ruh ba kum ki nongïalam ka jylla ki mad shibun ki jingkynthoh kiba lait phewjait khamtam ha kane ka juk buit elekshon mynta kiba mih ban pynbiej shisien ha ka san snem.
Na ka liang u Bah Kit Nongrem President National People’s Youth Front, Meghalaya u la ong ba mynta ha rilum Khasi ki ñiew ïa u Bah Prestone kum u kpa bad u kñi ban ïalam. “Ngi ïohi ruh ha ki social media katno kiba kren beiñ ïa i bad ruh ïa ki nongïalam ka NPP hynrei tang kawei kaba pynkmen ka long ba ki nongïalam kim ju pynsngap ïa kita baroh hynrei ki pyndep beit ïa la ka kamram,” u la ong.
Ha kajuh ka por u la ïaroh ruh ïa ki nongthep vote ka Pynursla constituency la ka long naduh ki samla haduh ki ba la heh la san namar ka jingtbit jong ki ban jied ïa ki nongmihkhmat namar ki jied ym tang na bynta ka constituency hynrei na ka bynta ban ïalam ïa ka jylla ruh baroh kawei.