Bun ki party ba kyrshan ban pynlong elekshon ha kajuh ka por ha baroh kawei ka Ri

New Delhi, Lber 14 : Ka High level Committee kaba peit halor ka jingpynlong lang ïa ki elekshon ha kajuh ka por ba la thung hapoh ka jingïalam jong u Ram Nath Kovind, President barim jong ka India, ka la ïakynduh ïa ka President jong ka India, Droupadi Murmu bad aiti ïa ka Kaiphod.
Kane ka Kaiphod kaba kynthup haduh 18,626 sla, kadei ka jingmih jong ki jingïamir jingmut bad kito kiba don bynta ha kane ka kam, ki riewshemphang bad ka kam wad bniah kaba 191 sngi, naduh ba la thung ïa ka ha ka 02 tarik Nailur, 2023.
Kiwei kiwei ki dkhot jong ka Committee ki kynthup ïa u Myntri ka tnad Kampohiing ka Ri, u Amit Shah, u GhulamNabi Azad, Nongïalam barim jong ka Liang pyrshah ha Rajya Sabha, u N.K. Singh, Chairman barim ka 15th Finance Commission, Dr.Subhash C. Kashyap, Secretary General barim ka Lok Sabha, u Harish Salve, Senior Advocate, bad u Sanjay Kothari, Chief Vigilance Commissioner barim.
La donlang ruh naduh u Arjun Ram Meghwal, Myntri Khynnah (Independent Charge) Tnat Law and Justice kum u nongshah khot kyrpang bad Dr.Niten Chandra u long u Secretary jong ka HLC.
Ka Committee ka la pynlong ïa ki jingïamir jingmut ban sngewthuh ïa ki jingsngew jong kito kiba don bynta ha kane ka kam.
La don haduh 47 tylli ki seng sain pyrthei kiba la aiti ïa ki jingsngew bad ki jingai jingmut jong ki bad na kane 32 tylli ki kyrshan ïa ka jingpynlong elekshon lang ha kajuh ka por.
Bun ki seng sain pyrthei ki la pynlong ki jingïamir jingmut bad ka HLC halor kane ka phang. Hadien ka jingpynbna paidbah ba la pyllait ha ki kot khubor ha baroh ki jylla bad ki Union territory, 21,558 tylli ki jubab kidei kiba la ïoh pdiang na ki briew jong ka ri. Na kine haduh 80 per cent kiba jubab ki kyrshan ïa ka jingpynlon gelekshon ha kajuh ka por.
La khot sngewbha ruh da ka Komiti ïa ki riewshemphang ha ka ain kum saw ngut ki Chief Justice ba rim jong ka India, phra ngut ki State Election Commissioner bad Chairman, Law Commission of India ban ïakren halor kane ka kam. La twad jingmut ruh na ka Election Commission jong ka ri India.
La khot ruh ïa ki kynhun kiba trei ha ki kam khaii pateng kum ka CII, FICCI, ASSOCHAM bad ki riewshemphang ha ki kam ka ïoh ka kot ba kin ai jingmut halor ka jingktah ïa ka ïoh ka kot lada pynlong elekshon lang ha kajuh ka por. Ki la ong ba kane ka long kaba donkam na ka bynta ka ïoh ka kot namar ka jingpynlong elekshon ha ki por bapher bapher ka wanrah ïa ka jingkiew dor ki mar bad ka jingsuki jong ka ïoh ka kot. Kine ki kynhun ki la ong ïa ka Komiti ba ka jingpynlongelekshon na ka por sha ka por ka ktah ïa ka jingkiew ka ïoh ka kot, ka jingpynlut pisa na ka bynta ki paidbah, ka pule puthi bad ka ktah ruh ïa ka shongsuk shongsain ha ka imlang sahlang.
Hadien ka jingpyrkhat jylliew shaphang kine ki jingai jingmut bad ki jingsngew, ka Komiti ka la ai jingmut ïa ka rukom treikam kaba ar bynta ban ïalam sha ka jingpynlong lang ïa ka elekshon ha kajuh ka por. Kum ka sienjam ba nyngkong, yn pynlong elekshon lang na ka bynta ka Iing Dorbar Thaw ain jong ki paidbah bad ki Iing dorbar Thaw Ain jong ki Jylla.
Ha ka sienjam kaba ar, yn pynïahap lang ïa ki elekshon na ka bynta ki Municipality bad ki Panchayat ha kajuh ka por bad kine ki Iing Dorbar Thaw Ain ha ka rukom ba ki elekshon jong ki Municipality bad ki Panchayat kin long hapoh shispah sngi hadien ba la pynlong ïa ki elekshon na ka bynta ka Iing Dorbar Thaw ain jong ki paidbah bad ki Iing dorbar Thaw Ain jong ki Jylla.
Ka Komiti ka la ai jingmut ruh ba ka dei ban don tang kawei ka electoral roll bad ki Electoral Photo Identity Card (EPIC) ban pyndonkam ha ki elekshon na ka bynta ki lai kyrdan jong ka Sorkar.
Katkum ka kam jong ka ban peit ïa ki rukom pyntreikam na ka bynta ka jingpynlong lang ïa ki elekshon ha kajuh ka por, bad da kaba kynmaw ïa ka jinglong jong ka Riti Synshar, ka Komiti ka la ai ïa ki jingmut jong ka ha ka rukom ba ïahap bad ka jinglong jong ka Riti Synshar jong ka India bad ha ka rukom ba donkam tang katto katne ki jingpynkylla ïa ka Riti Synshar.
Hadien ki jingïamir jingmut, ka Komiti ka la ong ba baroh ki jingai jingmut jong ka kin kyntiew ïa ka jingshai, ka jingai bynta lang ïa baroh, ka jingshaniah bad ka jingsuk jong ki nongthep vote. Ka jingkyrshan kaba pura na ka bynta ka jingpynlong lang ïa ka elekshon ha kajuh ka por kan kyntiew ïa ki kam na ka bynta ka roi ka par bad ka jingïaid ryntih ka imlang sahlang, pynskhem ïa ka nongrim jong ka synsha rpaidbah, bad pynurlong ïa ki jing thmu jong ka India kaba long ka Bharat.
Ïa ka kaiphod ba pura lah ban ïoh ha ka: onoe.gov.in/HLC-Report.
Shon hangne ban ïoh ïa ka: Kaiphod ha ka ktien phareng (https://onoe.gov.in/HLC-Report-en#flipbook-df_manual_book/1/), Kaiphod ha ka ktien Hindi (https://onoe.gov.in/HLC-Report-hi#flipbook-df_manual_book/1/), Flyer English, Flyer Hindi, FAQs.(PIB)