Shillong, Nailur 10: Ka khubor ba la ïoh na ki pulit la ïathuh ba u Bah Helme Phawa u la phah ka jingujor ba ha ka 3 tarik mynta u bnai, ki runar bym lah ban ithuh ki la tuh ïa ka thuk thuk jong u kaba dang thymmai napoh ka shnong Mooralong Jowai (WJH).
Ha kawei pat ka jingjia ki pulit ki la ïathuh ba u Sandistar N Sangma u la phah ka jingujor pyrshah ïa 2 ngut ki briew kiba kyrteng u Teseng Sangma, President bad u Grith Marak, Secretary jong ka shnong Sokadam Balding kaba hab hapoh ka Songsak PS (EGH) da kaba kynnoh ba ki khlem siew ïa ka bainong ki nongbylla Job card jong u naduh ka snem 2023 haduh mynta.
Sa kawei pat ka jingjia kawei ka longkmie kaba sah ha Tura (WGH) ka la phah ka jingujor ba ha ka 17 tarik u Nailar, 2024 ha ka por kumba 4.14 baje janmied, ka la shah phone lah bun sien, ha kaba ha kane ka jingjia katei ka longkmie ka la shah thok ha u nongphone ka pisa kaba la poi T. 22,000/-.
Ha kawei pat ka khubor ki pulit ki la ïoh jingtip ba ha ka mied jong ka 2 tarik mynta u bnai, uwei u Munath Ali bad ka kurim jong u kaba kyrteng ka Rani Begum (55 yrs) ki la shah sumar hapoh Civil Hospital Tura, na ka jingbym tip briew. Ha ka jingtohkit la lap ba ha ka 2 tarik mynta u bnai ha ka por kumba 8 baje mynmied, 3 ngut ki briew bym lah ban ithuh ki la leit sha ka ïing u Munath Ali kaba ha Teporpara (SWGH) bad kham hadien ki la jah noh napoh katei ka ïing utei u lanot. Ha kane ka jingjia la suba ba kitei ki lanot ki la shah ai bih ha kitei ki 3 ngut bad kitei ki runar ki la rongei ruh ïa ki tiar ki tar bad kawei ka mobile phone na kitei ki lanot.
Shuh shuh ha ka mied jong ka 3 tarik mynta u bnai, ki paidbah ki la ïoh bat ïa uwei u briew uba kyrteng u Rongchak Sangma bad uwei u khynnah ba dang 16 snem ka rta ha ryngkat bad kawei ka thuk thuk napoh ka shnong Harigaon (SWGH). Hadien kane na ka liang ki pulit ki la kurup noh ïa katei ka thuk thuk bad ki la phah noh ïa utei u khynnah sha Shelter Home (Boys), Ampati, katba u Rongchak Sangma u la ïoh ban phet krad na kane ka jingjia.
