New Delhi, Naitung 15: Bun ki jingduwai bad ki jingrwai ba la aiti sha u Shree Jagannatha ki la don hangta ha ka jingkynmaw jong nga naduh dang rit. Nga sngew kmen haba nga rwai ïa ki jingrwai bhajan jong u Mahaprabhu Jagannatha ha ka por ba nga dang pule ha skul bad kolej. Nga sngew jan bha bad u Mahaprabhu. Ngam ju rwai shuh ïa ki bhajan ha kine ki sngi. Hynrei nga kynmaw ïa u Mahaprabhu bad nga kynud ïa ki bhajan jong u man la ka sngi.
Nga ju sngew ïa ka jingdon jong u Mahaprabhu hajan jong nga. U kyrshan ïa nga ha ki por kiba jynjar. Haduh kine ki sngi, nga kynud ïa ka jingrwai ba la thaw da u Bhakta Kabi Madhusudan Rao kaba ong kumne: ‘U Mahaprabhu u don ryngkat bad nga bad sngi bad miet; da kane ka jingkynmaw, ngan ïai mane ïa u da ka dohnud baroh’.
Shuwa ba nga la poi ha ka rta kaba nga lah ban sngewthuh katto katne ïa kiei kiei shaphang ka pyrthei, nga la sngewthuh ïa ka jingkhraw jong u Mahaprabhu Jagannatha. Ha ïing, la ju don ki jingïakren shaphang u Mahaprabhu Jagannatha. Kum kine ki jingïakren bunsien ki ju jia ha shnong jong ngi ruh. Ha ka por ba nga pule ha ka skul shnong, nga la ju pule man ka por ïa ka jingduwai ‘Ahe Nila Shaila’ ba la thoh da u Bhakta Salbeg.
U nonghikai jong ngi u ju iathuh shibun shaphang u Mahaprabhu Jagannatha: Don kawei ka temple kaba heh ha Puri, bad ym don kawei pat ka temple kaba itynnad kum kata! Ha katei ka temple, la mane ïa u Mahaprabhu Shree Jagannatha ryngkat bad ka para jong u ka Subhadra bad u para jong u u Balabhadra. U Mahaprabhu Jagannatha u long uba dum sniehdoh bad u don ki khmat kiba pyllun. Ka sniehdoh jong ka Subhadra ka long kaba stem bad jong u Balabhadra pat ka long kaba lieh kum u syntiew ba phyrnai na ka jingtyngshaiñ jong u bnai.
Shisien ba phi la ïohi ïa ki blei, phim lah ban klet ïa ki. U nonghikai jong ngi ruh u ju ong, u Jagannatha u long u ‘Mahaprabhu’, ka prasad jong u ka long ‘Mahaprasada’, ka temple jong u ka dei ka ‘Bada Deula’ ne ka Temple bah, ka lynti jong u ka dei ka ‘Bada Danda’, kata ka lynti bah, bad ka duriaw jong u ka dei ka ‘Mahodadhi’ ne ka Duriaw Bah. Ka Purushottam Kshetra, Puri ka jngai na ka shnong trai jong nga, ka Uparbeda ha ka elaka Mayurbhanj.
Kumno ngan ïoh lad ban leit jngoh ïa ka Puri? Katba nga nang san, nga la leit sha Bhubaneswar bad nga la pynrung kyrteng ïalade kum ka khynnah skul ha ka Unit-2 Girls High School. Nga la sdang ban sah ha ka hostel hangta. Nangta nga la ïoh lad ban leit jngoh ïa ka Puri, ka Bhubaneswar, bad ka Konark. Ka jingai ïa ka darshan ba nyngkong jong nga ïa u Mahaprabhu Jagannatha ka dang sah ha ka jingkynmaw jong nga. Katno ka long ka temple kaba phylla, kum kine ki blei kiba khraw! Hato lah ban klet ïa kine?
Hato don mano mano ba lah ban klet ïa ka Ratha Yatra jong u Mahaprabhu Jagannatha? La ong ba ki 13 tylli ki tamasa ki ju rakhe ha ki khatar bnai jong ka shisnem ha Shree-Kshetra. Hynrei ka jingitynnad jong ka Ratha Yatra ka long kaba kyrpang. Ki nongmane ki ïawan lang ha ka temple baroh shi snem ban ïoh ïa ka darshan jong u Mahaprabhu.
Hynrei shisien shisnem, u Mahaprabhu hi u mih na ka temple bad u leit sha ka temple Gundicha kaba don lyngba ka lynti Vishal, da kaba ai darshan ïa ki nongmane jong U. Ha ki lai tylli ki kali ba itynnad, ki lai tylli ki Blei, ryngkat bad ka Chakraraja Sudarshana, ki leit jngoh ïa ka temple Gundicha. Ki sah hangta hynñiew sngi bad ki sa wan phai pat. Kane ka jinglehniam kaba khraw jong u Mahaprabhu ka long kaba ym lah ban ïanujor.
Naduh ba nga dang khynnah, nga la long kaba bud ïa u Mahaprabhu Jagannatha. U la ju long u Blei uba nga burom tam. U synshar ïa ki jingkiew bad ki jinghiar jong ka jingim jong nga. U long ka tyllong jong ki jingkmen bad ki jingsngewsih jong nga. Nga la shah shibun ki jingeh ha ka jingim jong nga. Bad u Mahaprabhu u la ju pyllait ïa nga na kita ki jingeh baroh. Nga long shisha ka khun jong U.
Haba la pynbna ïa ka jingïakhun jong nga na ka bynta ka kam President ka ri India, nga la kynmaw burom ïa ka kyrteng u Mahaprabhu. Nga la duwai ha u Mahaprabhu, ‘Phi ïalam ïa nga sha ki kyrdan kiba kum kine. Nga kyrpad ïa Me ban ïalam ïa nga ha man la ka sienjam bad ban don ryngkat bad nga man ka por.’ U la sngap ïa ka jingduwai jong nga. U ju jubab ïa ki jingduwai jong nga.
Ka Ratha Yatra ka la dei ban rakhe haba nga la dei ban sah ha Delhi kum ka kyrtong ban ïoh ïa ka kam President. Kumta, kam long kaba lah ïa nga ban leit sha Puri. Dangstep, ha ka sngi Ratha Yatra, nga la leit sha ka Temple Shree Jagannatha ha Hauz Khas, Delhi, bad nga la ïoh darshan na u Mahaprabhu. Ka dohnud jong nga ka la dap da ka jingkmen. U la ai ïa ki jingkyrkhu jong U ïa nga. Da kaba dap da ka jingshaniah, nga la ai ïa ka kot kyrtong jong nga.
Nga la ïashim bynta ha ka jingïalap elekshon da ka jingsngewtynnat kaba khraw. Nga dang duwai ha u Mahaprabhu Jagannath, ha ka lynti jong nga sha Central Hall jong ka Parliament na ka bynta ban bam smai kum ka President ha ka 25 tarik u Naitung 2022. Da ka jingkyrkhu jong U, ka kam ka la ïaid ryntih. Ha ka por ba nga ai jingkren nyngkong kum ka President, ka la long kumba U don hangta ryngkat bad nga.
Hynrei ka dohnud jong nga ka thrang ban leit sha Puri ban ïoh darshan na u Mahaprabhu. Ki sngi ki la ïaid, hynrei ngam lah ban leit sha Puri. Ka la wan ha ka jingmut jong nga; kumno uno uno un ïoh ïa ka darshan jong U lymda U ai ïa ka! Nga la duwai jar jar ha U, ‘Lada nga la leh bakla, map ïa nga, Mahaprabhu! Hynrei sngewbha khot ïa nga sha Puri, ai ïa nga ïa ka jingkyrkhu jong Me.’ U long u Mahaprabhu jong ka ‘Bhaav’ ne ki jingsngew.
Kumno Um lah ban sngewthuh ïa ki jingsngew jong nga? Kham hadien, la buh por ban leit jngoh ïa ka Puri. Ka tarik ka long ha ka 10 tarik u Naiwieng, 2022. Hadien ba la poi ha Puri, ngi la ïaid shakhmat sha ka Shree Mandir. Katba ngi dang poi ha ka Bada Danda jong ka Puri, ka jingsngew ba phylla ka la dap ha nga. Ka Bada Danda ka dei ka jong u Shri Jagannatha. Hato don kano kano ka kam kaba nga hap ban pyndep hangne? Ka Puri ka pawnam kum ka Kshetra-Raj, kaba kongsan tam na ki jaka leit pilkrim baroh.
U Mahaprabhu u long U Blei jong ki Blei. Khlem da pyrkhat shuh, nga la phah ban pynsangeh ïa ka kali jong nga. Ynda ka kali jong nga ka la sangeh, baroh ki kali kiba bud ïa ka kali jong nga ruh ki la sangeh. Shwa ba uno uno un sngewthuh ïa kaei kaba jia, nga la sdang ban ïaid khlem da phong juti sha ka Bada Danda. Ka Shree Mandir ka jngai kumba ar kilomitar eiei. Da kaba peit beit ïa ka Neel-Chakra jong ka temple bad ka Patit Paawan Dhwaj kaba kyntang halor ka Shikhar, nga la ïaid shakhmat.
Katba nga nang ïaid, nga ruh nga ïai khublei ïa ki khynnah, ki kynthei, ki samla bad ki tymmen kiba la ïalum lang ha baroh arliang ka surok. Ka jingpyrkhat jong nga ka la long ha u Mahaprabhu. Ha ka khyllipmat ba nga la poi hajan Sinh-Dwaar, ka Khyrdop jong ka temple, ngam lah ban shongthait. Ha kata ka por, nga la klet noh ia lade. Da kaba thiah ha ka khyndew jong ka Bada Danda, ka lynti kaba kyntang, nga la tyrwa ïa la ka Pranam da ka jingsngewrit ha u Mahaprabhu.
Nangta nga la rung shapoh ka temple. Mar ïa poi ha Garbh-Griha bad ïoh darshan ïa ki saw ngut ki blei, nga la dap da ka jingkmen ba kynja Blei. U Mahaprabhu u long u nongïada ïa ka pyrthei. U long u nongpynim ïa kito kiba la iehnoh da baroh. U don beit ban pynduna ïa ki jingsngewsih jong ki briew ha ka pyrthei baroh kawei. Dei na kata ka daw ba ki khmat jong U kim ju khap.
Na ka bynta jong U, ym don jingïapher hapdeng kiba heh ne kiba rit. Ha ki khmat jong U baroh ki long kiba ïaryngkat bad ka jinglong marryngkat jong baroh ka long ka nongrim jong U. Da kaba ïoh jingkyrkhu na U, nga la aiti lut ïalade ha ka jingshakri ïa kawei pa kawei ka bynta jong ka imlang sahlang.
Haba nga peit sha u Mahaprabhu Jagannatha, uta uba don ki khmat ba pyllun, nga la kner ïa la ki kti ha ka jingburom bad nga la duwai, ‘To ai ba ki jingkyrkhu jong Me kin pynneh junom ïa ka mynsiem jong ka jingaiti lut jong nga ha ka jingshakri ïa ki paidbah, ko Mahabahu! Pynbiang ïa ka jingïada jong me ïa ka ri jong ngi bad ka pyrthei baroh kawei, ko Kripanidhi.’ Da kaba ong kumne, nga shem ïalade ba nga la ngam jylliew ha ka Bhakti-Bhav, la thoh da ka President ka Ri India ka Droupadi Murmu New Delhi.
