Shillong, Rymphang 28: Ka Election Commission jong ka ri India lyngba ka tnad elekshon ha jylla, kala ïoh lut ïa ki jingkheiñ ha kaba ïadei bad ka jingwan thep vote ki paidbah ha ki 59 tylli ki Constituency jong ka jylla.
Katkum ka jingkheiñ ba la pynmih da u Chief Electoral Officer jong ka Meghalaya, u Bah Fredrick Roy Kharkongor, ka Mookaiaw Constituency kadei kaba bun eh ha ka liang ka Percentage ha kaba ka poi haduh 92.73%, kata 36,102 na ki 38,932 ngut ka jingdon ki nongthep vote.Hynrei ha kaba ïadei bad ka jingbun eh kiba wan thep vote kaba wan ba nyngkong kadei ka Sutnga- Saipung kaba ki nongthep vote ki wan 42,643 na ki 46,962 ngut,kata 90.80%.
Ha kaba ïadei bad ka Percentage ka Mawthadraishan Constituency ha Eastern West Khasi Hills District ka wan ba ar ha kaba ki nongthep vote ki la wan 91.70% kaba mut kiba wan ki long 40,105 ngut na ki 43,734 ngut. Ka Amlarem ka wan balai ha ka liang ka Percentage, haba ka ïoh 90.97%, kaba muit ki nongthep vote ki wan 35,608 ngut na ki 39141 ngut ka jingdon ki nongthep vote.Ka South Shillong kadei ka Constituency kaba wan duna eh ki nongthep vote ki wan tang 21,074 ngut na ki 33,934 ngut kaba long tang 62.10%. Kiwei pat ki Constituency kiba hap ha Sor Shillong kum ka North Shillong, ka East Shillong, ka West Shillong ki wan tang hapoh 65%. Ka Nongthymmai ruh ka wan tang 66.58%.
Kumjuh ruh ki artylli ki Constituency kiba hap ha ka sor Tura, kata ka North Tura bad ka South Tura ki wan tang hapoh 76%.
