Shillong, Naiwieng 18 : U Myntri ka tnad Tourism ka sorkar jylla, Bah Paul Lyngdoh ha ka sngi Nyngkong u la ong ba nyngkong nyngkong kin dei ki paidbah kiban kynthoh bad kynthoh lada jia ba kum ki nongmihkhmat bad kum ki Myntri Sorkar kim poi ha ka por kaba bïang sha kino kino ki prokram lane ki jingïalang ba ki khot.
“Baroh ki khot ïangi ban wan sha ki prokram jong ki skul, jong ki shnong, ki jingïalang, ki jingkhawai, shaba don ba pang, ki jingïathoh, bad ruh sha ba ïap briew. Haba kumta tang ïano ngin pynhun. Lada ngi poi slem sha kino kino ki prokram ruh kin khñium bad lada ngi slem ban khot ïa ki sha kamra ruh kin khñium bad kynthoh harukom. Hynrei lada ngi pyndonkam ïa ki ‘siren’ ruh ki khñium. Haba kumta ngin leh shuh sa kumno,” u la ong haba kren bad ki lad pathai khubor.
U Bah Paul u ong ruh ba ha kane ka jingjur ka dheng kali lada ki mih ha ka por ba biang ruh kin sahkut beit lai kynta ha pdeng surok. “Kaba mut ba kam dei kaba suk ban beh lut ïa ki kam ha baroh ar tylli ki bynta, kata ban pyndep ïa ki kam ba ïadei bad ka sorkar bad ha kawei ka lïang pat bad ki paidbah. Watla ngi kwah ban pynduna ïa ki prokram hynrei ka jingdawa pat na ki paidbah ka nang jur,” la ïathuh shuh shuh u Bah Paul.
Kumta, u ong ba lada ki paidbah ki sngewthuh lem ïa ka jingeh ba ki kum ki nongïalam kin jin da la kmen eh. Ha kawei ka liang, u ong ruh ba ha ka rukom ñiah kali ha Shillong lada ym don lei lei sa ka dheng ym tip shuh kaei kaban jia na ka jingïa rung ïa mih ki kali kat naba mon na ka jingñiah kali pathar kaba la palat.
