Shillong, Nailar 30: U president ka Meghalaya Trinamool Congress u bah Charles Pyngrope ula kyntu ïa ka sorkar jylla ban khmih bha biang haba ïadei bad ka National Education Policy (NEP) 2020 da kaba kynnoh ba kane ka Policy kan pynjot ïa ka pule puthi jong ki samla hadien ha bud.
Haba kylli, kaei ka nongrim jong ka Party haba ïadei bad jingpyntreikam ïa ka NEP hapoh Meghalaya u bah Charles ula ong “Mynhynnin nga dang dep ïakren bad u principal barim ka St. Edmund’s College bad ula pynpaw da kaba ong ba ka sorkar jylla lyngba ka State Education Commission ka dei ban khmih biang shwa ïa kane ka Policy”.
U bah Charles ula kyntu ïa ka sorkar ban sangeh shwa ka jingpyntreikam ïa ka NEP bad ka dei ban ïasyllok shwa bad ki stad haka pule puthi namar kumba u ïohi kane ka Policy ka don jingktah ïa ki samla pule bad ïa ka pule puthi hapoh jylla.
“Kane ka Policy ka don jingma ïa ki samla pule bad namar kata nga kyntu ïa ka sorkar jylla ban pynsangeh shwa ïa ka jingpyntreikam bad ka dei ruh ban ïathir bha shwa bad ki stad pule kynthup ka State Education Policy Commission na ka bynta khmih bniah ïa ka jingduhnong bad ka jingmyntoi lada pyntreikam ïa kane ka Policy” ula ong.
