Jowai, Jymmang 21: Shi bynta na ka sngi ‘International Aids Candel Light Memorial Day’ na ka liang ka Jaiñtia Network of Positive People ha ryngkat ka jingïarap pisa ka Meghalaya Control Society Shillong mynta ka sngi kala pynlong ïa ka prokram halor ka jingpang HIV/AIDS kaba la long ha Salaroh MCSWA Hall, Jowai.
Na ka liang Dr Rida Pusein Incharge ART Civil Hospital Ialong haba ai jingkren kala pyntip ba ïa kane ka sngi la sdang rakhe naduh ka 1 tarik April 1983 ha San Francisco ha manla ka sngi u Blei (Sunday) jong ka taiew ba lai jong u bnai Jymmang. Kane ka long shi bynta ban kymmaw burom ïa kito kiba la khlad na ka jingpang AIDS bad kan long ruh kum ka lad ban ai mynsiem lem ïa kito kiba dang im bad u khñiang jingpang HIV bad kiba haïing hasem jong ki ruh kin peit lem ïa ki jingeh ba ki ïa kynduh.
Shuh shuh kala pyntip ba ka ‘National Aids Control Organisation ka don ka jingthmu ban rat dyngkhong ne pynkut ïa kane ka jingpang ha ka 2030’ bad ban jop ïa kane dei lyngba ka jingleit ai jinghikai sha ki paidbah lyngba ki prokram bad ki lad ban sumar ïalade.
Kala ong ruh ba ka thong jong ka NACO ka long ban ïaleh kumno ban pynllait ïa kane ka jingpang ba kan ym ïoh lad shuh ban ïabit thymmai sha kiwei bad kiba ïap na kane ka jingpang kim ym don shuh hapoh katei ka snem.
Ha kane ka sngi la pynlong ruh ia ka jingsngap jar, ka jingthang ïa ki mombati, bad ka jingpule ba la shim da iwei na ki para member jong ka JNP. Kiwei de kiba ïadonlang ha kane ka sngi ki long u Ajoy Lanong na ka MACS, ka Dr JN Shullai Director MCSWA, ka kong Sunita Suna PM MCSWA, ma B. Kharmalki, ma R Suchiang President JNP, ma M. Biate Secretary JNP bad ki wei de.
