Shillong, Nailur 01: Ka Managing Committee jong ka skul Soso Tham Memorial Secondary School bad ryngkat ka Khasi Students’ Union ki lah ïoh ban buh mawnongrim ban pynkiew sa shi mala ïa ka skul Soso Tham Memorial Secondary School lyngba ka CSR project ba la ïoh na ka DIAGEO.
Ïa kane ka skul la plie ha u 18 tarik u Nohprah, 2020 ha Lawsohtun Block – VI bad ka don ïa ka klas 8-10. Ïa kane ka skul la thaw kyrpang da ka Khasi Students’ Union Laban Circle na bynta ki khynnah shynrang bad kynthei kiba wan na ki longïing ba duna bad ki ba lah ieh noh ïa ki jingpule ki jong ki shiteng por na ki daw bapher bapher. Kane ka skul ka ai jingpule ei ïa ki khynnah khlem shim pisa (free education). Kane ka skul ka lah don haduh 40 ngut ki khynnah kiba ïoh jingpule ei na kane ka skul.
Ka Managing Committee bad ka Seng ka don jingthmu ban pynmih sa shi mala ïa kane ka skul khnang ban ïoh kyntiew ïa ka sha ka Higher Secondary School, ban ai jingpule na bynta ka klas 11 bad 12.
Ha kane ka sngi la don ryngkat ka Sumitra Panthi, Cluster Head, North East, Diageo, Mr. Surajit Dutta, Public Policy Lead, Diageo, Managing Committee jong ka skul ba la lam khmat da Bah Daniel Khyriem Chairman ka MC, Bah Airpeace Rani, Secretary MC, Samla Pynkmenlang Sanmiet, Education Secretary KSU, Reuben Najiar Asst. General Secretary KSU bad President KSU Laban Circle, Bah Manly Nongpluh Finance Secretary KSU, Samla Iaishan Mukhim, Asst. Finance Secy, KSU, Samla Alerick Kharjana, Asst. Finance Secy KSU, Bah Harribert Rynjah, Rangbah Shnong Lawsohtun, ki dkhot na ki Dorbar Shnong, dkhot ka Laban Circle, ki nonghikai bad khynnah jong ka skul Soso Tham Memorial Secondary School.
