Buh mawbynna bad pyllait ka KSU Rangthong ïa ka jingrwai ha ka jingdap 25 snem

Mawkyrwat, Jymmang 02: Ka Khasi Students’ Union (KSU) Rangthong Unit ha ka jingrakhe ïa ka jingdap 25 snem ha ka sngi Thohdieng ka la plie paidbah ïa u mawsah nam bad ïa ka jingrwai kaba la ai kyrteng, “Mait Shaphrang” ha kaba u President ka Khasi Students’ Union (KSU) Central Body samla Lambokstarwell Marngar, u la long kum u kongsan.
ïa ka Khasi Students’ Union (KSU) Rangthong Unit la seng ha ka 1 tarik, Jymmang, 2000. Ha kane ka sngi la pynkup burom ïa ki nongkitkam barim jong ka KSU Rangthong Unit kiba la long ki nongprat lynti ba ka seng ka la ïaid shaphrang haduh ba kan da kynjoh ïa u mawmer ba 25 snem bad ka jingaikhusnam ïa nongïakop mareh thong ba la dep pynlong ha kine ki sngi ba la dep.
Haba kren ha ka jingïalang, u samla Lambokstarwell u la pynkynmaw ïa ki dkhot jong ka seng ba shibun kiba kynthoh ba ki nongïalam ki ïoh da ka tulop hynrei ula pynshai paidbah da kaba ong, “ka KSU ki ïoh ka tulop da ki “jingshah pyntyr-ha”, “ki jingshah kren beiñ”, “ki jingshah kynthoh” bad “ki jingrung ha ki a-long” lyngba ki aiñ jong ka sorkar bad ka tulop ba ki shim ka long ka “ka jingkitkhlieh”, “ka jingïaishah” bad “ka jinglen-lade” na ka bynta ka ri bad ka jaid bynriew baroh kawei.
Da kaba ai mynsiem ïa ki dkhot jong ka KSU Rangthong Unit u la ong ba kum ki dkhot jong ka seng kim dei ban kynran dien ban trei bad pyntyllun ïa ki kam hynrei ki dei ban ïaid shakhmat ryngkat ka mynsiem jong ka jingïatylli, ïa long kawei, ïaid da ka jingsngewrit ha ki liang baroh bad da kaba kiar na kino kino ki kam kiba long pyrshah ïa ki bor shnong bor thaw namar kum ki nongïalam ba hakhmat kim kwah ïa kaba kum kata.
Shuh shuh ba haduh mynta kum ka jaidbynriew ka dang sngewdonbok ba ka dang don la ka jong ki Riti ki dustur bad bat ïa la ka khyndew ka shyiap lyngba da ki jingïohi jngai ki myn barim, bad lada khlem ma ki kane ka ri lum khasi jong ngi ka la kylla madan. Namarkata, u la ai mynsiem ba kum ki samla ri ngi donkam ban pynneh pynsah ïa ki jinglong trai ka jong ngi ban bat ïa u lakam jong ka jinlongtrai ïa ka khyndew ka shyiap khamatam ïa ka riti ka dustur.
Kiwei de kiba la ïa donlang bad kiba la ai jingkren ki long u Bah Blosding Wanniang kum u symbud kongsan, u bah Kitborlang Nongrem, Myntri Shnong Rangthong, u bah Forwardman Nongrem, President ka KSU South West Khasi Hills District, u bah Amstrong Shangdiar, u President barim jong ka KSU Rangthong Unit, u bah Airmarshal Diengngan, u bah D.G. Nongsiej lem bad kiwei kiwei.