Khliehriat, Naiwieng 20 : Ka jingsuki palat ka jingpyntrei ïa ka surok National Highway 6 ha ka thaiñ Narpuh ka ka la nang wanrah jingeh bad buh jingma shuh shuh ïa ki paidbah nongleit nongwan, ki thymmei khubor ki iathuh ba watla ka jingpyntrei ka la iaid hynrei don tang khyndiat eh ki nongtrei bad ka jingiaid ka kam ruh ka suki haduh katta katta.
Watla ka la don ka jingtwa ka nala tuid um ne ka culvert da myn ha kine ki khyndiat bnai ha ka thaiñ Umkiang bad ka la wanrah ïa ka jingdheng kali kaba jur bha ha ka thaiñ, ki nongshong shnong jong ka thaiñ ki la iathuh ba ki dang don bun ki nala tuid um kiba la donkam ban maramot bha, ka don kawei ka culvert ha surok NH-6 ha shnong Umkiang ruh kaba la julor mynta la slem bha hynrei dang mynta ki nongtrei jong ka NHAI ki la sdang ban pyntrei bad kane ka jingpyntrei bad jingmaramot ruh ka long suki bha bad ki nongtrei ruh ki duna bha ha kane ka jingpyntrei ïa katei ka culvert kaba ha Umkiang bad lada ka long kumne tang ban maramot ïa ki culvert ruh kam shim por wat shi snem ruh.
Ki paidbah nongshong shnong jong ka thaiñ Narpuh, ki ju pynpaw ka jingsngew diaw bad sngew khia namar ka jing bym shim khia lem ka sorkar ha kaba iadei bad ka jing julor palat ka surok, ki jingkieng ha ka thaiñ Narpuh, ki la ong ruh ba “imat kane ka sorkar kam kheiñ shuh ïa ngi kum ki briew hynrei ka la shu kheiñ ïa ngi kum ki mrad, ka surok ruh ka la long kum ka surok khlaw ba iaid ki mrad ka bym i dei shuh kum kata ka surok national highway”
Ym lah ban len ba ka jingdheng kali ka ju jia man la ka sngi ha ka thaiñ Narpuh, kata naduh Sonapyrdi ter ter shaduh Malidor na ka daw ka jingsniew palat ka surok bad ki nala tuid um kiba heh ne ki culvert, bun ki kali ki kylla hapdeng surok, bun ki kali ki sniew shiteng lynti, ym tang katta ki paidbah ki mad jingeh namar ha ka por ba rang ba rkhiang ki mad tang ka khyndew pum pum ba jur bha bad ha ka por ba hap slap ki mad tang ka jyrsieh kaba jur.
Namar ka jingsuki palat ka rukom pyntrei ïa ka surok, ïa ki jingkieng bad ki culvert kane ka la pynsah umdum bad pyn duh jingkyrmen ïa ki paidbah bad ka la ktah ruh ïa ka leit ka wan ym tang ïa ki briew ka thaiñ hynrei wat ïa kito kiba na kiwei kiwei ki jylla ba mar jan ruh kiba ju iaid lyngba na kane ka surok ki kynduh jingeh, mynta ki paidbah ki shu ap khmihlynti lano ka kam kan iaid shaid shaid ha kaba pynbha ïa ka surok, jingkieng namar kane ka dang dei ka por ka aiom ba rang ba rkhiang.
