Buh jingkylli ka VPP ba pynmih result arsien ka MPSC ïa ka eksamin MCS
Sa 62 ngut kiba ha ka jingpynbna result kaba ar ïa kajuh ka eksamin
Shillong, Naitung 25: Ka Voice of the People Party (VPP) ka la pynpaw ka jingsngewkhia bad ka jingbym sngewtynnad halor ka jingle jong ka MPSC kaba la pynmih arsien ïa ka result jong ka Preliminary Examination jong ka Meghalaya Civil Serivices (MCS) kaba la long ha ka 4 tarik u Naiwieng jong ka snem 2023.
Ka kyrwoh ba la pyllait da u Dr. Kara Shen, Vice President jong ka Seng, ka ong ba ka Notification ba la pynmih da ka MPSC ha ka 23 tarik mynta u bnai ka pynartatien bad wanrah ruh bun ki jingkylli, namar ha kane ka jingpynbna la pynmih result biang da kaba pynpass sa 62 ngut ki Candidate, kata nalor kiba la pass ha ka result kaba la pynmih ha 15 tarik u Nohprah 2023.
Ka Seng ka ong ba kane ka jingpynbna biang ka MPSC arsien ïa ka result, kadei halor ka jingujor jong uwei u Candidate uba la ujor halor ki jingkylli ba la ai ha ka eksam.
Related Posts
Ka Seng ka buh ka jingkylli halor kiei ki kyndon ne ki rule ba la peit biang (reccjeck) ïa ka result kat haduh ba la pynpass biang sa haduh 62 ngut napdeng ki Candidate kiba ïaleh ïa ka eksam.
“Kane ka pyni ba kam don jingkhuid ne jingïaid beit ha kaba ïadei bad ka jingpynlong ïa ka eksam”, la ong u Dr. Kara Shen, da kaba bynrap ba kane ka pynartatien shi kat dei ïa ki paidbah jong ka jylla.
Shuh shuh ka Seng ka ong ba ka jingshim por haduh hynñiew bnai ban pynmih biang ïa ka result sa shisien, ka pynpaw ba ka lah ban don kaei kaei ha lyndet kaba lah ban long ba la pynpass ïano ïano kiba khlem pass ruh tang ba don jingïadei bad kiba don ha ka bor. “Kane khlem pep kan nang pynduh jingshaniah ïa ka jingtreikam jong ka Commission”, la ong ka kyrwoh ba ka Seng.
Nalorkane, ka VPP ka ong ruh ba kane ka jingjia, ka pyni ïa ka jingbym ler treikam ka MPSC bad ïa ka jinglong thurmur jong ka ha kaba pynlong ïa ki eksam.
Kumta na ka liang ka Party, ka dawa ba kadei ban don ka jingkhmih bniah ha kaba ïadei bad kane ka jingpeit ne kata ka rechecking process ïa ka result ba la pynmih da ka MPSC, namar ba kane ka jingpynbeit ne jingpynmih biang ïa ka result tang halor kawei ka jingujor ka pyni ïa ka jingbym biang ka rukom pynlong ïa ka eksam bad ka buh ka jingkylli ruh ïa ka jingtreikam kaba khuid bad bym ïashah liang jong kane ka bor ba pynlong eksam na ka bynta ban ïoh kam ha ki tnad treikam jong ka sorkar.