Shillong, Nailar, 27: Ka MLA jong Trinamool Congress na Mahendraganj Constituency ka Dikkanchi D Shira ha ka sngi Saitjaiñ ka la buh jingkylli ïa ka Sorkar Meghalaya Democratic Alliance (MDA) ba ïalam da ka National Peoples Party (NPP) halor ka jyllei ka jingtih be-aiñ ïa u dewiong bad ka jingkular kai ïa ki kynthei.
Haba kren ha ka jingïalang kaba la long ha ka shnong Mahendraganj, ka Dikkanchi ka la takraiñ tyngeh ïa ka Sorkar MDA da kaba ong, “hato kaei kaba ka Sorkar MDA ka la leh na ka bynta ka jylla? Ka jingtih be-aiñ ïa u dewiong ka jur bha ha Meghalaya. Manla ka sngi, bun ki briew ki duh ei ïa la ka jong ka jingim na kane ka daw. Hynrei ka Sorkar MDA ka la kyntait mardor haba ngi rah ïa ka jingkylli hapoh ka Iingdorbar Thawaiñ ka Jylla.”
“Nga kwah ban wanrah ïa ka Maternity & Child Hospital ha kane ka Constituency namar ka jingjur shaba palat ka jingïap jong ki khunlung. Ïa ka pisa la mang naduh san snem mynshwa hynrei ka Sorkar MDA kam shym la shimkhia eiei haduh mynta. Ha Ingdorbar Thawaiñ la pyntip ba shen yn sa sdang noh ïa ka jingtrei hynrei haduh mynta ym pat ïohi eiei satia. Ki paidbah ka Jylla kin ïai kynmaw ïa kine ki jingkular thok kiba la khlei da ka Sorkar kaba mynta bad ki paidbah hi kin sa ai jubab ha ka elekshon ka ban sa wan,” la ong ka Dikkanchi.
Ka TMC ka la pynlong ïa kane ka jingïalang ha Mahendraganj, South West Garo Hills khnang ban pynïar shuh shuh ïa ki thapniang treikam sha ki kyndong kynshrot jong ka jylla. Ha kane ka sngi, la sakhi lang da u State Vice-President jong ka TMC u Zenith Sangma lem bad u MLA ka Salmanapara u Winnerson D Sangma bad ki paidbah kiba la ïashim bynta da ki hajar ngut.
U Zenith Sangma uba la kynthoh tyngeh ïa ka Sorkar MDA ha kane ka sngi, u la ong, “kumno ki nud ban pynïaid ïa ki trok sha khappud? Ha u snem 2018-20, kawei ka trok ka hap ban siew T. 70,000. Mynta ka dor ban jam sha shiliang pud ka long haduh T. 1,10,000. Ïa ka khajna ba la siew ruh la shu pyndonkam bakla.
“Ki paidbah ki la duhei ïa la ka jingim na ka daw ka jingtih dewiong be-aiñ. Bun sa tang ki jingjia basngewsih kat shaba phai. Ïa u dewiong ba la tih be-aiñ la shalan shabar ka ri lyngba ka khappud. Ka long kaba i jahburom ba kum kine ki wan jia hakhmat ka Sorkar hynrei ka Sorkar MDA ka len pylleiñ pylleiñ,” la kynnoh u Zenith.
Ki nongïalam jong ka TMC ki la takraiñ tyngeh ïa ka Sorkar MDA ha kane ka jingïalang bad ki la khot bad wer ruh ïa ki paidbah nongshong shnong jong ka Mahendraganj Constituency ba kin pyrkhat thymmai noh nangne shakhmat khnang ban wanrah ïa ki jingkylla ha synshar ka khadar ha ka Jylla bad ban jynrat syndon ïa ka Sorkar MDA kaba dei ka dur bula jong ka seng BJP.
