Shillong, Nailar, 27: U Bah Banteidor Lyngdoh, Myntri ba dei khmih ïa ka tnad kam rep ka Sorkar Jylla u la pyntip ba ka tnad Corporation ha ka 25 tarik u Nailar, 2022 ka la pynmih ïa ka Office Order ba ki nongrep kiba dei ban ïoh ïa ka sboh dawai lyngba ka MECOFED kin ïoh ïa ka jingïarap ne ka subsidy kaba long 50 % na ka dor kaba la buh.
Ha ki khyndiat sngi, u Bah Banteidor u la aiti da ka jingthoh sha u Myntri Sorkar India ba dei peit ïa ka tnad kam rep, u Narendra Singh Tomar ha Delhi ban pyntip ba ka Sorkar Meghalaya lyngba ka tnad kam rep ka la pynmih ïa ka Office Order ha ka 09 tarik u Nailar, 2022 ban ailad ïa ki nongrep ha ki katto katne ki jaka ban ïoh pyndonkam biang ïa ka dawai sboh hadien 8 snem tam ba la khang ïa ka subsidy na ka bynta ka dawai sboh kata naduh u snem 2014.
Da kaba pynpaw ba ki nongrep ki shem jingeh hadien ka jingpynkut noh ïa ka subsidy dawai sboh, u Bah Banteidor ha ka jingthoh u la bsuh lang ïa ka mang jingdonkam dawai sboh ha ka Jylla kum ka Urea, DAP MOP, SSP bad kiwei pat.
Kane ka jingleit u Bah Banteidor sha Delhi ka la long tang shi sngi hadien ka jingïalang pynshai bad pynsngewthuh paidbah ïa ka jingailad biang ka tnad ban pyndonkam dawai sboh khamtam ki nongrep bad ki nongïalam shnong ha Mawkatheiñ.
U Bah Banteidor u la ong ba ka dor dawai ka rem palat bad u la pyntip sha u Myntri Rangbah ka Jylla, u Conrad K Sangma namar kan dang shem jingeh ïa ki nongrep ban thied ïa ka.
U la ong ba ka bhah ïoh dawai sboh ka rit bha haba ïa nujor bad kiwei pat ki Jylla hynrei ka dor ka rem palat hadien ka jingïakren bad ki ophisar ka tnad jong ka Sorkar India nalor ka bai kit ha kaba na Shillong kin hap wan shaw pat naduh Guwahati.
Kumta u la kyntu ïa ka Sorkar Jylla ban ailad da ka subsidy bad ka tnad ka Corporation ka la pynmih ïa ka Order ka ban pynmyntoi ïa ki nongrep kiba shim dawai sboh lyngba ka MECOFED.
U la pynpaw ka jingai khublei ïa ka Sorkar Jylla kaba la shim khia ïa kane ka phang jingdonkam ki nongrep ha kaba ka tnad Corporation ka la pynmih ïa katei ka Order.
Ka dor dawai sboh hadien ka jingpynkut ïa ka subsidy ka la kiew palat namar ka jingdie tuh ïa ka bad kane ka la wanrah jingeh ïa ki nongrep.
