Buh ïaka party shadien, wer ki heh Congress ïaki paidbah ban mih ryntih ba wan ïuh kjat u Rahul ha Pahamsyiem

Nongpoh, K’Lyngkot, 21: Ki heh jong ka party Congress ha Meghalaya naduh u Ma Vincent H Pala President ka MPCC, Dr. Celestine Lyngdoh Working President, Bah Charles Marngar President RBDCC, Bah Gabriel Wahlang bad kiwei ki heh nongïalam jong ka party Congress mynta ka sngi kila khot bad wer ïa ki paidbah ban ïa mih ryntih lashai ka sngi ha Madan NSCA Pahamsyiem na ka bynta ban pdiang burom ïa ka jingwan ïuh kjat jong u Rahul Gandhi bad ban sngap ïa ki jingkren bad jingpynshai jong u halor ka hok bad ka jingshah iuhroit jong ki paidbah ka ri.
Haba kren sha ki lad pathai khubor mynta ka sngi ha madan NSCA Pahamsyiem, u Ma Vincent H Pala bad u Dr. C Lyngdoh kila ong ba kane ka jingwan ïuhkjat jong u Rahul Gandhi kam dei tang na ka bynta ka party Congress, hynrei ha kadur ka dar jong u Rahul Gandhi u ba la ïaid kjat baroh kawei ka ri India ban kren ne pynpaw paidbah halor shibun ki jingshah khñiot beit ki paidbah ba la tip ruh kum kata ka ‘Bharat Jodo Nyay Yatra’ ban ïaid kjat na ka bynta ka jingïatylli bad ban ïa khun ïa ka hok jong ki paidbah hapoh ka ri India.
Kila ong ruh ba ha katei ka jingïalang kaba u Rahul Gandhi un sa pynshai sha ki paidbah ba baroh kawei ka ri dei ban long salonsar lang kumjuh khlem da noh shilliang namar kumba long mynta ki don shibun ki kynhun kiba isih ïa kawei pat ka kynhun, kawei ka ñiam ïa kawei pat ka ïaid hapoh ka ri India mynta te ha kadur ka dar jong u Rahul Gandhi u ba ïaid kjat baroh kawei ka ri India ban ong ba ka jingïeid ka dang don ka jingshañiah ka dang don, ka jingburom iwei ïa iwei ka dang don bad kata ka dei ka thong kaba u wan ïuh kjat ha kane ka jaka na ka bynta ka jylla bad ka ri India.
Dei halor katei ka nongrim kum ki heh nongïalam jong ka party Congress ki khot bad wer ïa ki paidbah ban mih ryntih lashai ka sngi naduh ka por 1 baje nohphai sngi ban pyni ba ki ïasnohkti lang na ka bynta ka thong jong ka hok longbriew manbriew ka hok jong ki rit paid, ka hok jong ngi kum ki Balang khristan bapher bapher, ka hok jong ngi ban mane Blei bad shakri laitluid bad kane ka dei ka jinglaitluid kaba ngi kwah ban pynneh hapoh ka ri India baroh kawei, khlem da kheiñ bad buh ïa ka party shadien la ong kitei ki nongïalam.
Kumba la ïohi ne sakhi, ka Meghalaya Pradesh Congress Committee ryngkat ka Ri Bhoi District Congress Committee ki la shim khia bha na ka bynta ban pynkhreh pynkrum bad ruh ban pynriam pynbeit da ki rong ki rup ha madan Pahamsyiem na ka bynta ban pdiang burom ïa kane ka jingwan ïuh kjat u Rahul Gandhi kum u nongïalam bahkhlieh duh ka party Congress hapoh ka ri India.