Buh da ka Checkpoint ban pyrkhing ïa ki syiar ba wanrah nabar, kyrpad ka RBLSA ïa ka Sorkar

By Mawphor Editor On Apr 27, 2025

Shillong, Ïaïong, 26: Ka Ri Bhoi Livestock And Supplier Association (RBLSA) ha ka sngi Thohdieng ka la kyrpad ïa ka Sorkar Jylla ban buh noh da ka jaka talasi ne ka Checkpoint hapoh u pud u sam jong ka Ribhoi District khnang ban khanglad ïa ka jingwanrah ïa ki syiar kiba nabar shapoh ka jylla Meghalaya.
Ki nongïalam ka seng ki la aiti ruh da ka dorkhas ha u Myntri ka tnat Animal Husbandry and Veterinary ha kaba ïadei bad ka jingpan ïa ka No Objection Certificate ban buhnoh ïa ka jaka talasi ne ka Check Point hapoh u pud-u sam jong ka Ri-Bhoi District.
Ha ka jingïakren bad ki lad pathai khubor u President jong ka Ri Bhoi Livestock And Supplier Association Bah Pynshngaiñ Shylla u la ong, ha ka jingïalang jong kynhun kaba la pynlong ha ka 5 tarik mynta u bnai la shim ïa ka rai ban phah da ka shithi sha ki bor ba dei khmih na ka bynta ban ailad ïa ka seng ba buh noh ïa ka Check Point na ka bynta ban khmih ïa ki mrad hashwa ba kin rung shapoh ka Jylla Meghalaya kiba wanrah nabar ka jylla.
U la ong ba ka jingmut jong kane ka Check Point ka long ban pynthikna na ka bynta ka koit ka khiah bad ka jingshngaiñ jong ki paidbah nongbam doh bad ha kajuh ka por ruh ban pynmih ïa ka khajna jong ka Sorkar.
U President ka seng u la ong ba ki jaka kaba ka Association ka la tyrwa ban buh ïa ki khyrdop talasi ha Ri-Bhoi ki long ha Umsiang Maïong, Mawlasnai, Jirang bad ka ka thaiñ Byrnihat.
U Bah Shylla ula pynpaw ruh ba ka don kawei ka kynhun ïa kaba la tip kum kaba la die ïa ka ‘challan’ ha ka thaiñ Umsiang ha ka dor kaba T. 2,500 kawei ka kali Pickup bad ha ka thaiñ Jirang kaba la die ha ka dor T. 3, 500. Halor kane na ka liang jong ka seng ka la pyntip sha ka tnat Animal Husbandry and Veterinary ban shimkhia.
Shuh shuh u la ïathuh ba u Myntri u la pynpaw ïa ka jingkloi ban ïatreilang bad ka seng ban leh ïa ka donkam bad u la kyntu ïa ka seng ba ïa mynta kin hap ban rejistar shwa ïa ka ïew bad hadien kata un sa leh ïa kaba donkam.
Halor ka jinglum khajna be-aiñ da kawei ka kynhun, u Myntri ula ong ba halor kane ka Sorkar kan sa khmih bha bad ynda ka la lap ïa ki jingshisha kan sa shim da ki sienjam kiba tyngeh.