Bthei ka thma pohïing ha Srilanka, shah pynïap u MP, hiar shuki u PM
![](https://mawphor.com/wp-content/uploads/2022/05/SRILANKA.jpg)
Colombo, Jymmang 09: Hadien bun bun bnai ka jingïakhih pyrshah da ki paidbah ïa ka sorkar ha Srilanka, mynta ka sngi, ka la bthei syndon da ka thma pohïing bad ka jingïaumsnam ha kane ka ri kaba don tang harum khyndiat jong ka ri India.
Kane ka jingïaumsnam ka la bthei kynsan, haba ki nongkyrshan jong ka sorkar u Mahinda Rajapaksa, ki la thombor kynsan kynsan ïa ki paidbah kiba pyrshah sorkar kiba la ïeng ha khmat ïing jong u Myntri Rangbah Duh. Namar kane ka jingthombor ba kynsan, ka jingïakulmar ka la put kylleng kylleng ki jaka jong kane ka ri dewlynnong.
Ha kane ka jingjia, uwei u MP jong ka Liang Synshar u la shah pynïap ha ki paidbah hadien ba u la siat ïa ki katto katne ngut ki riew paidbah da ka Pistol. Hynrei ki ba laitim, ki la beh thong ïa u bad lap ba u dang rieh ha kawei ka ïing bad ki la lyngeit ïa u haduh ba un da ïap syndon.
Lah ban kdew hangne ba kane ka jingïaumsnam kadei kaba ka sdang da ka jingïakhih naduh kine ki bnai baladep, hadien ba kane ka ri ka la lad ïa ka jingkyrduh bam, kyrduh umphniang bad mad ruh ïa ka jinghiar ka ïoh ka kot bad ka kamai kajih, namar ka jingbamsap bad ka jingsynshar donbor ka longïing jong u Rajapaksa, ha kaba u para jong u pat, u Gotabaya Rajapaksa, udei u President jong ka ri.
Ki paidbah da ka jingbitar ki la thang ïa ki ïing jong ki Myntri sorkar bad kumjuh ruh ïa ki jingteinam jong ki kmie jong kine ki arngut ki shipara, u Myntri Rangbah Duh bad u President jong ka ri.
Ki Pulit kiba la phah da ka sorkar ban tem ïa kane ka jingïakhih, ki la kylla long pynban ki nongpeit ïa ka jingïaid beit ka jingsam marbam bad ym don ba peit ban tem ïa ka jingïaumsnam.
La ïoh jingtip ba da ki spah ngut ki briew ki la mynsaw ha kane ka jingjia, kaba la pynkhynñiuh ñiak ïa ka ri hi baroh kawei.